Lah ban wan phai biang u bah George sha ka Congress

U MLA barim ka Umroi uba jop na ka Congress mynshwa, u George B Lyngdoh u lah ban wan phai biang sha ka Congress.
Haba kren mynta ka sngi, u President ka MPCC u bah Vincent H Pala ula ong ba u sngew kmen ba u nongialam paidbah uba tbit u bah George u dang don ha ka jingiakren bad ka party ban wan phai biang ha kaba u bah Pala ula kyrpad ia u ban pyrkhat biang ban wan sha ka party.
Katkum ka jingong u bah Pala, u bah George u dang pan por ban iasyllok shwa bad ki nongkyrshan lashai ne la shi sngi, shwa ba un shim ia ka rai rangbah halor kane.
U bah Pala ula ong ba donkam ban don ki nongialam kiba bha bad kiba iohi jngai kum u bah George. “Nga sngew kmen ba nga la kynduh ia u bah George (George B Lyngdoh), kyrpad ia u ban wan biang sha ka Congress. Nga la ioh jingtip ba u dang iasyllok shwa ia ki nongkyrshan jong u, lashai ne lashi sngi ban rai. Nga la ong ia u, ba ngi donkam ki briew kiba bha, ki politishian kiba bha”, la ong u bah Pala.
Lah ban kdew ba u bah George ula jop MLA na ka Congress hynrei ula mih noh na ka party shwa ka elekshon 2023 ban leit iasoh sha ka TMC.