Lah ban tohkit ka sorkar ia ka jingpyndonkam bakla pisa ha KHADC

Shillong, 19 Rymphang:
Ka sorkar jylla ka lah ban phah tohkit halor ka jingkynnoh pyndon-kam bakla iaka pisa jong ka KHADC da ka Executive Committee ba ialam da u CEM u Bah Pynshngain N Syiem.
Katkum ka khubor, ka sorkar ka lah ban thung jingtohkit hadien ba ka UDP ka la ujor sha ka sorkar da kaba kynnoh ba u Bah Pynshngain u la pyndonkam bakla ia ka pisa jong ka Council haduh kumba T. 2 klur eiei.
La iathuh ba ka jingujor ka UDP pyrshah ia u Bah Pynshngain ia ka jingpyndonkam bakla ia ka pisa ka Council kan long ruh kum ka kabu ia ka sorkar Congress ban ioh pynhiar kput ia u Bah Pynshngain uba la shah sospon lai snem ha ka party halor ka jingkynnoh pyrshah seng.
Kham mynshwa ruh, ka sorkar ka la thung ia ka jingtohkit ban wad ia ka jingkynnoh pyndonkam bakla ia ka pisa ha ka GHADC ha u snem 2009-10. Hynrei haduh mynta, ka sorkar kam pat ai satia ia ka kaiphod jong kane ka jingtohkit.
Ym pat tip la ka sorkar kan thung jingtohkit da kano ka jait jingtohkit hynrei kumba ka long ia ka GHADC, la khlieh ia ka jingtohkit fa u Justice (retd) P.G Agarwal.
U bah HS Shylla u la ong u CEM Bah Pynshngain katkum ba paw ka la don ka jingpyndonkam bakla ia ka pisa ka Council ha kaba la thep sha ka account u riew shimet bad la pyndonkam ruh ban ai sha ka Khasi Heritage Conservation Forum (KHCF) .