Lah ban shah weng ki 102ngut ki head master jong ki skul, naba ym don kiba pass Class 10

GUWAHATI: Ka sorkar Assam, ka la byrngem ban weng kam noh ia ki 102 ngut ki khlieh jong ki skul bapher ha katei ka jylla, na ka daw, ba ka result jong ka class 10, kaba dang shu mih shen, ka sniew palat ha kitei ki skul.

Na kitei ki skul, ki don 25 tylli, ki bym don satia, tang uwei ruh uba pass ha katei ka eksamin, 70 tylli ki duna ia ka 10 percent bad sa 7 tylli kiwei pat, ki don 10 percent kiba pass.

Ha ka jingpan jing pynshai, ka Mamata Hojai, Director ka Secondary Education Department, ka la pan jingshai na ki headmaster jong kitei ki skul ban kylli, ia ka daw, ba kim dei ban shah beh noh, na ki kam jongki. La bthah ia kitei ki skul, ba kin jubab ha shwa ka 9tarik Jylliew, 2022.

Ha Cachar district, ki don 14 tylli kiba kum kitei ki skul, katba ka Karngi Anglong, ka don 13 tylli, kiba kum kitei ki skul. Ka jingpass ki khynnah mynta u snem, ka long 56.49 percent.