Shillong:U Bah Charles Pyngrope u ba dei u President jong ka All India Trinamool Congress(AITC) jong ka jylla Meghalaya u la ong ba ka seng AITC kan sa pynieng kyrtong ha baroh 60 tylli ki konstitwensi ha kane ka jylla ha ka elekshon MLA ka ban sa long ha u snem 2023.
Haba kren sha ki lad pathai khubor, hadien ba la wai ka jingialang rung dkhot jong ki paidbah ka Nongthymmai Constituency sha ka TMC, ha kaba la long ha ka sngi Nyngkong kata ka 6 tarik u bnai Nohprah 2021 ha Windermere, u Bah Charles Pyngrope u la ong ba kam da don jingeh than ia ka seng AITC ha u snem 2023 khamtam ha Ri Lum Khasi Jaiñtia namar ba ki paidbah ki peit ia u briew bad ka seng ka wan hadien.
U Bah Charles Pyngrope u la ong ruh ba ka AITC ka la don lypa bun ki briew kiba biang bad kin don ruh sa kiwei ki MDC bad ki MLA kiba mynta ki ban sa wan rung bad pyniasoh noh ialade bad ka seng TMC hashwa u snem 2023. Shuh shuh u Bah Charles Pyngrope u la ong ba kum u President jong ka seng ha ka jylla u sdang ban pynkhlaiñ shwa ia ka seng AITC hapoh ka konstitwensi lajong kata ha Nongthymmai Constituency bad nangne pat un sa iaid kylleng ki bynta jong ka jylla ban thaw ia ki Block thymmai jong ka seng bad u la ong ruh ba ki don ki Block kiba la don lypa hynrei hap tang ban shu pynkylla na ka Congress sha ka AITC ha ki sngi ki ban sa wan.
Phi don ban ong eiei?