Lah ban phet seng, lada ia pra mar shiteng rKa don ka ain kyntiap seng ha KHADC

Shillong, 11 Lber:
Mano ba ong, ba ka Khasi District Council, kam don ia ka ain kyntiap seng? Ban lap ia ka jingshisha U Rupang, ula peit ia ka website jong ka Khasi District Council, ha kaba la lap ba katei ka ain kyntiap seng, ka dei kaba la mynjur da U Lat ka Jylla, ha ka 3tarik Lber 2004 bad kaba la buh ha katei ka website jong ka Council, haduh ha kine ki sngi.
Na shibun ki kyndon, kiba la buh ha katei ka ain kyntiap seng, la kren shai, ba uno uno u dkhot uba jop kum u dkhot marwei ha ka Council, un lah ban pyniasoh ialade bad kano kano ka seng sain pyrthei, tangba un lah ban pyniasoh tang shisien bad utei un duh noh ia ka jinglong dkhot jongu, lada jia ba u mih noh, na katei ka seng, lane u ialeh pyrshah ia u shabuk, ba katei ka seng, ka bthah ba un leh. La batai ruh, ba u dkhot marwei, um lah ban bat ia ka kam Chairman, Deputy Chairman lane Chief Executive Member lane Member jong ka Executive Committee.
La ong shuh shuh, ba haba don ka jing ia pait ha ka kynhun jong ki dkhot kiba mihkhmat ha ka dorbar jong ka Khasi District Council, kaba ym duna ia ka mar shiteng bad ba ki thaw ia la ka jong ka kynhun, kumta kin lait na ka jingshah pyn ngat ha ka ain kyntiap seng. Katei ka ain, ka shong shuh shuh, ba lada jia ba ki kynhun seng bapher, ki ia soh lang bad ki pynlong ia kawei ka seng, kin nym shah pyn ngat satia ha ka ain kyntiap seng.
La ai bor ruh ban pyn trei kam ia katei ka ain, ha u lamphang dorbar bad lada ki don kino kino ki jingkylla dei ban buh ha ka jing mynjur jong ka iing bad ha kajuh ka por, la ong shuh shuh ba lada ka don kan kano ka jing pynduh ia ka jinglong dkhot jong uno uno U MDC, ba dei ban pyntip mar mar sha ka ophis jong U Lat ka Jylla.
Lyngba katei ka ain, ka don mynta ka jingkylli, kaba heh bha, la ka lamphang dorbar kaba mynta, kan leh kumno ia U bah PT Sawkmie, uba la mih na ka KHNAM, Ka Kong Grace Mary Kharpuri, kaba la mih na ka HSPDP, U bah Hadrian Lyngdoh, uba la mih na ka UDP bad U bah James Sylliang, uba la soh kham mynshwa bad ka Congress bad mynta pat bad ka ARPA?