Lah ban kyrshan ka UDP na rud, ia ka EC U Bah Ardent

Shillong,7 Nailur:
Ki nongialam ka UDP ki la ialeh katba lah ba iai ban pynthanda ia ki MDC jong ka bad ban pyrshang ban ia kren sngewthuh jingmut noh ia ka kynrum kynram kaba la mih hapoh ka ARPA, na ka jingbym hun jong ki ia ka rukom treikam u bah Ardent M Basaiaw moit, kaba ki la kynnoh ba baroh ki kam u la iaid lait bad leh khlem ka jingtip jong ki, wat ia ki kam, kiba dei ki kam kiba hapoh ka jingpeit jong ki.
Hynrei katei ka jing pynthanda ki nongialam ia ki MDC kam shym la seisoh satia namar ba ki MDC jong ka UDP ki ieng beit ha la ka nongrim ba dei ban bujli nongialam noh da uwei pat ha ka jaka u bah Ardent. Katkum ka tyllong khubor la iathuh ba ki nongialam rangbah ka UDP kim lah shuh ban leh eiei halor katei ka jingdawa bujli nongialam ki MDC jong ka , hynrei ban sngap namar ba ki dei ma ki kiba shong hapoh District Council.
Ki nongialam bad ki MDC ki la kubur ba ia ka kam CEM ka dei hok ban bat ka seng HSPDP, ka ba ioh ka jingbun paid tam na ka seng kaba don hapoh ka ARPA, hynrei ki la pynpaw pat ba ki kwah ba ka HSPDP kan sei da uwei pat u nongialam ha ka jaka u bah Ardent, bad katei ka dei ka rai kaba ka UDP ka ieng skhem.
Shuh shuh ki lad khubor kiba ia jan bha bad ka UDP ka la iathuh ba lada jia ba ka HSPDP kam lah ban sei da uwei pat u nongialam ha ka jaka u bah Ardent, ki MDC jong ka UDP kin iehnoh ia ka kam EM bad kin mih noh na ka EC, tangba kin ai ka jingkyrshan ia ka ARPA da kaba shong noh ialade sharud madan.
La ioh jingtip ruh ba haduh mynta ka UDP kam pat don kano kano ka jingiakren bad ka paralok barim jong ka ha District Council- ka seng Congress kaba ki la ia shonglang hapoh ka shatri jong ka KHUDA-II san snem pura ha ka samoi treikam kaba la dep.
Ka UDP, ka don saw ngut ki Executive Member ha ka Executive Committee ba mynta bad kitei ki kynthup ia u Bah Teinwell Dkhar, uba dei u Deputy CEM, U bah Don Sumer, uba dei U Executive, Kong Rona Khymdeit bad U Bah Hadrian Lyngdoh ki Executive Member.