Lah ban khang shalan doh masi sha Bangladesh

Shillong, 23 Iaiong:
Ka BJP kam shym la thmu ban khang bam doh masi hynrei ka la don ka jingiakren ba ka lah ban shu khang ban shalan ia ki doh masi sha bar ri kum ha Bangladesh.
Katkum ka khubor ba la iohlum, la iathuh ba hynne ka step shwa ban mih na Shillong u President Rangbah ka BJP u Amit Shah u la iakren bad katto katne ngut ki heh nongialam ha kaba la don lang u Myntri khynnah ka tnad kam pohiing u Kiran Rijiju uba la wan poi dang step ha Shillong. Ka thymmei khubor ka la iathuh ruh ba kine ki nongialam ka BJP ki la iakren ba ka jingiakhang ia ka doh masi kadei ka kam jong ka jylla bad ka sorkar pdeng kam don bynta eiei ruh em halor kane.
“Kaba kongsan ka jingkren jong ki kadei ba ka sorkar pdeng kadei ban khanglad ban shalan ia ka doh masi shabar ri”, la ong ka thymmei khubor.  
Lah ban kdew ba hynnin ka sngi, u General secretary ka party u Ram Madhav  u la ong ba ka party kan nym khang ia ka bam doh masi ha kane ka thain dong mihngi ka India. U la ong ba ka BJP kan pynthikna ba ka jingshngain jong ki paidbah na kane ka dong mihngi bad khlem shah niam ne khlem kano kano ka jingsngew pher niam ha ka ri. “Ngim shym la tyrwa ne phah ban khang doh masi hangne”, la ong u Madhav. U Madhav u la ong ba ki katto katne ki jylla, ka la don ka jingkhang bam doh masi la slem bha, watla um shym la jer ia kita ki jylla. U la ong ba ka jingkhang bam doh masi ha ki katto katne ki jylla kum ha Maharashtra la leh namar ka daw ba iadei bad ka ioh ka kot bad ka sorkar BJP ha ki jylla, kan bishar ia kane shwa ban shim ia ka rai.