Lah ban hiar shuki U Rajnath

New Delhi,
18 Jymmang:
Mynta ka sngi, ka

iaid bha, ka jingiakren ha ka nongbah Delhi, ha kaba u myntri rangbah duh, u ban sa shimti ia ka kam, U Narendra Modi, ula iakynduh ia ki nongialam ba rangbah, na ka bynta ban iakren, halor ka jingthaw thym mai ia ka sorkar ha Delhi. U General Secretery ka RSS, U Ram Lal bad U Arun Jaitley, uba dei uwei na ki nongialam ba rangbah jong ka seng BJP, ki la iakynduh ia U Rajnath Singh, President jong ka seng BJP ha ka iing sah jongu, ha kaba la don lang ruh U Amit Shah, uba dei u nongialam ba rangbah jong ka seng BJP, uba peit ia ka Uttar Pradesh,ha kane ka elekshon ba dang shu dep. U Narendra Modi, la sngewthuh, ba u kwah, ban ai, ia ka bynta kaba kham heh bha, ia U Amit Shah, ha kane ka kynti kaba mynta.
Na ka liang u dkhot jong ka RSS, U Ram Madhav, u ong ba ka RSS, kan nym lushia satia, ha ka jingthaw sorkar bad ka Sangh, kam kwah ban tuklar iano iano, ha ka jingthaw sorkar bad ula ong ba ka BJP, ka la shim ia ka mat, kaba ka Ri, ka la pdiang, kumta, ki dei ban ialam ia ka Ri shakhmat.
U Modi, mynta ka sngi, ula iakynduh ruh ia u nongialam ba rangbah jong ka seng BJP, U LK Advani, ha kaba ki la iakren, ia ka jingpynkhreh ban thaw sorkar thymmai. La sngewthuh ba yn jied nongialam ia U Modi, ha ka 20tarik, ha kaba un bam smai, ha ka 21tarik Jymmang 2014. Ka don ruh ka jingiakren, ia u nongialam, u ban shimti ia ka shuki President jong ka seng, namar ba U Rajnath Singh, un lah ban don ha ka sorkar bad U Modi.