Lah ban hap slap jur bad khie eriong, ha ki 24 kynta ban sa wan

Shillong: Mynta ka sngi, ym don slap satia ha Shillong, ha ka por kaba sdang naduh 8.30 mynstep, haduh 2.30 nohsngi, ong ka khubor jong ka tnat India Meteorological Department (IMD), hynrei hynnin ka sngi, ka jinghap slap ha ka nongbah Shillong, ka long 13.2mm. Ha Sohra ruh mynta ka sngi, ym don slap satia, katba hynnin pat, ka long 9.6mm bad ha Umiam, mynta ka sngi, ka long 3.2mm, katba hynnin ka poi sha ka 60.2mm.

Ha ki 24 kynta, ki ban wan, ka nongbah Shillong bad ki shnong ba marjan, kin mad ia u slap, uba malu malu bad uba kham jur. Ka IMD, ka ai jingmaham, ba ha kine ki 24 kynta ban wan, kan don ka jingtied pyrthat bad khie eriong, ha kaba ka jingstet jong ka lyer, kan long hapdeng ka 30 haduh 40 Kilometre ha ka shi kynta bad kan don ka jinghap slap, kaba jur, ha ki bynta jong ka jylla.