Lah ban duh pynlong World Cup ka Russia bad ka Qatar

Zurich, 7 Jjylliew:
Ka Russia ka lah ban duh noh ban pynlong World Cup ha u 2018 bad kumjuh ruh ka Qatar ha u 2022; lada lap ba ka don ka jingleh bakla ne ka jingleh buit tuh ban jied ia kitei ki ri ban ioh pynlong World Cup. Haduh mynta ka jing tohkit ka dang iaid sha khmat halor ki jingkyn noh ba ka don ka jingbam sap kaba jur hapoh ka rukom pyniaid jong ka FIFA iathuh u Domenico Scala, u Chairman ka Fi FA Audit bad ka komiti kaba peit ia katei ka jingtohkit haba kren sha ki lad khubor.
Ka jingtohkit ia ka jingkynnoh bamsap ka long ruh ba kumno ki bor pyniaid ka Russia bad ka Qatar ka ioh ban pynlong World Cup ha kitei ki snem ki ban wan, iathuh ki bor ain jong ka US sha ki lad khubor.
“Lada lap ia ki jingshisha ba ka jingioh pynlong World Cup ka Russia bad Qatar ha kitei ki snem ka dei namar ka jingpyndonkam da ka buit ban shu ia thied vote , kitei ki ri kin ym ioh ban pynlong World Cup” ong u Scala sha ki nongthohkhubor mynta ka sngi uba la ong ba haduh mynta ym pat lah ban pynshisha.
Katba ka Russia bad ka Qatar pat ka la kam ba kam don kano kano ka jingiaid da ki lynti kiba bakla ban ioh pynlong World Cup ha kitei ki snem. U Secretery bar ri jong ka Ri Bilat, u Philip Hammond u la ong ba u kyrshan ia ka jingioh pynlong World Cup ka Qatar ha u snem 2022 hynrei ka Bilat ruh kan kham sngewtynnad ha kiwei pat ki ri lada jia ba ka FIFA kan jied da kiwei pat ki ri.
“Ngi tyrwa ba ngi kyrshan ia kino kino ki ri kiba la shah jied ban ioh pynlong World Cup” ong u Hammond haba kren bad ka told BBC World Service radio, uba la ong ruh ba ka rai ba khadduh ka dei ka FIFA. Lah ban kdew ba shibun ki jingiakren ki la mih na ka jingkynnoh ba ka don ka bamsap kaba jur hapoh ka FIFA ha kaba u President jong ka u Sepp Blater u la risain noh na ka shuki jong u ban iaid beit ka jingtohkit.