Shillong:Ka liang Pyrshah Voice of the People Party (VPP) ha ka sngi Ba-ar, kala buh ïa ka jingujor pyrshah halor ka jinglah ban don ka jingthep vote proxy (thep tuh) ha Ri-lum Jaiñtia, ha kane ka ilekshon Lok Sabha ban long la 19 tarik Ïaïong.
Ha ka shithi sha u Chief Electoral Officer (CEO) Dr BDR Tiwari, u Election Agent ka VPP, u Danny Langstieh ula ong, “Da ka jingsngewkhia kaba jur, nga kwah ban ïathuh ba, katkum ki jingtip ba ngi ïoh na ki nongtrei jong ka party, ka lah ban don ka jingpyrshang ban mushlia ïa ka jingpynïaid ïa ka ilekshon kaba khuid ba suba ha Jylla khamtam ha ri lum Jaiñtia da ki riew bymman kiba khwan myntoi shimet. Ka lah ban don ka jingthep vote proxy ne thep vote tuh lada ki nongpynïaid ïa ka ilekshon kim peit pyrman bad kitkhia shisha ïa ka kam ba la bynshet”.
“Ka party ka kyntu jur ïa phi ban shim ïa ki sienjam kiba donkam ha kaban pynthikna ïa ka ilekshon kaba khuid ba suba bad ba ki nongthep vote kin ïoh ban leit thep ïa ki vote jong ki khlem kano kano ka jingtieng bad ka jingïathep tuh ïa ki vote kan ym jia satia,” ula ong ha ka jingujor.
Husiar, Da peit bha ia ka symbol au ba mih na ka machine thep vote ynda phi la dep ïon khnang ba phin ioh ia la ka Jong ka hok…ioh lehse ka machine kam da trei kam bha