Lah ban bujli President noh ka UDP ha ka jingialang ha u Rymphang

Shillong, 28 Nohprah:
Ka seng trai ri heh tam ha kane ka jylla ka United Democratic Party (UDP) kan sa pynlong ia ka jingialang jied nongkitkam ha u Rymphang u snem ban wan.
Katkum ka tyllong khubor, ka party ka la don hapdeng ka jingpynkhreh
ban jied ia U President jongka lada ioh da uba thymmai. Ia ka UDP, la ialam da u Dr Donkupar Roy kum u President ha kine ki snem ba la dep haduh kine ki sngi.
La iathuh ba ki don katto katne ki MLA jong ka party kiba kwah ban shimti ia ka kam nong ialam jong ka party ha jaka jong u Dr Donkupar Roy hynrei ka jingiakren iasyllok hapdeng ki dkhot jong ka party ka dang iaid mynta.
Ki don ki MLA ki nongkitkam ka party kiba dang kwah ban bteng biang u Dr Donkupar kum u President hynrei ki don pat kiba la sngew ba la dei ka por ba un ailad lem sa ia kiwei ban shimti ia kane ka lyngkor ban ialam ia ka party ha ka elekshon MLA ka ban sa wan ha u snem 2018.
Katkum ka khubor ba la ioh, kiba paw kiba lah ban shimti ia ka kam president ka party ki long u Bah Bindo M Lanong uba ong myntri u Working President bad u ruh u Bah Paul Lyngdoh uba bat ia kajuh ka kyrdan ha ka party kum u Working President.
Ka la don ka jingiakren kaba jur ha ka party hadien ba kam shym la lah ban jop bun ha ka elekshon MLA kaba la dep ia ka jinglong nongialam jong u Dr Donkupar kiba sngew ba dei ban jied da uwei u nongialam ban pynthymmai ban pynkhlain ia ka party.
U Rupang uba la ioh iakren katto katne ngut ki briew ka UDP,  la sngew ba kane ka party ka don hapdeng ka jinghiran nongialam ia mynta namar ba kim don shuh ki nongialam kum myshwa kiba satar bad kiba ieid  da u paidbah.
Nalor u Bah Paul Lyngdoh bad u Bah Bindo M Lanong, uwei pat uba paw kyrteng ban shimti ia ka kam president ka party dei u Dr Jemino Mawthoh hynrei namar ba u dang thymmai ha ka jinglong MLA bad ha ka party ka don ka jingsngew ha ki nongialam jong ka party.
Ka jingialang ban jied nongialam thymmai ha u Rymphang kan long ruh ban peit ia ka thong jong ka party na ka bynta ka elekshon ban wan ha u snem 2018 namar ba ka UDP ka thmu ban ioh ban bat ia ka bor synshar ha katei ka snem khamtam ba ka Congress ka la hiar ha ka ri baroh kawei na ka jingkhlain bor ka BJP.