Lah ban bujli myntri kam poh iing U Mukul? Mano ban shimti ha jaka ka kong Roshan?

Shillong, 20 Jylliew:
Haba ka mih ka jing iakren ha kine ki sngi, halor ka jingiaknieh nongia lam ha ka sorkar jong U Mukul Sangma, hynrei ka don ruh ka khubor, kaba iakren ha kine ki sngi, ba ka kong Roshan Warjri, myntri kam poh iing jong ka sorkar Jylla, ka la pynpaw sha u myntri rangbah, ba kam kwah shuh ban dang bat ia ka tnat kam poh iing, kaba dei ka tnat, kaba mih shibun ki jingshah kdew kti pyrshah ha kine ki sngi, khamtam halor ki kam pyntriem bapher ha Garo Hills. Halor katei ka phang, la sngewthuh ba u myntri rangbah, u shem jingeh shibun, ban ioh ia uwei pat u myntri kam poh iing, uba u lah ban shaniah, namar ba u kwah ruh, ba u myntri kam poh iing, un dei uba na Khasi Jaintia Hills hi.
Don ki lad khubor, kiba pynsngew ba yn aiti noh ia ka tnat kam pynroi sor, sha ka kong Roshan Warjri bad ia ka tnat kam poh iing, ban ai noh sha ka kong Ampareen Lyng doh (wat la katei ka khubor ruh kam pat shai bha satia).
Ha shwa ka dorbar Jylla, ka la mih ka jingiakren, ba u myntri rangbah, un lah ban bate kam ia ki myntri jongu, ynda la kut ka dorbar Jylla bad ha kine ki sngi, ka la sdang mih ka jingiakren; hynrei ka wan pat mynta, ba la kan wan da ka jing bate kam ia ki myntri sorkar ne kan wan pynban, da ka jing bujli nongialam ha ka Sorkar.