Ladep pun 9 bnai kynthih, sei madan noh ia ka kaiphod jong U Bah Cherishterfield, ong ka FKJGP

Shillong: Ka FKJGP Sengkmie, ha ka kyrwoh mynta ka sngi, ka dawa ia ka sorkar jylla, ba kam dei shuh ban dang pynslem ban sei madan ia ki jingshisha baroh bad ba kam dei shuh ban dang aidaw ba katei ka kaiphod (report)  ka long “highly confidential” hynrei dei ban pyntip paidbah haba shit haba shai (Black & White) khnang ba ki paidbah kin ym sah satia ha ka umdum. “Ka seng hi ka sngew ba kaei kaba la pun khyndai bnai (August 2021- May 2022), ka por ka la ih mynta ban paw ki jingshisha baroh” ong ka kyrwoh.

Ka jingkynthoh jong katei ka seng, ka dei hadien ba la iohi lyngba ki lad pathai khubor haba iadei bad ka jing submit ia ka kaiphod (report) kaba la mih lyngba ka inquiry commission bala khlieh da u Justice (retd) T Vaiphei, ha kaba iadei bad ka jing shah siat iap jong u nongialam barim ka HNLC U Bah Cheristerfield Thangkhiew (Bam kwai ha dwar U Blei), ia kaba la phah sha Chief Minister ka jylla U Conrad Sangma ha ka sngi thohdieng, ka seng ka dap da ka jinglynga pisa ban tip ia kae ikaba don ha katei ka report namar kumba ka long mynta hi katei ka jingjia kaba la jia ha ka step jong ka 13tarik Nailar 2021 ka dang buh hapdeng ka jingsah dum ym tang ia ka seng hynrei iaki paidbah nongshong shnong jong ka jylla hi baroh kawei.

Kum ban shu pyn kynmaw ba hadien ka jing shah siat iap jong utei u nongialam barim ka HNLC, U Bah Cheristerfield Thangkhiew, ha ka step jong ka 13tarik Nailar 2021, la mih shibun ki kynrum kynram kaba la wanrah ruh ia ka jingiakhih paidbah ha kylleng ki bynta jong ka rilum Khasi Jaintia ban dawa ia ka jingbishar kaba hok bad kaba laitluid. Ka jingslem ban bishar bniah halor katei ka kam ka la jan dap shisnem duna bad kala pyn artatien ia uba bun balang ba lehse ka lah ban don kaei re kaei sha lyndet. Ka FKJGP Sengkmie ka pynpaw ba kumba ka long mynta ym don satia ba tip ia kaei kaba la thoh bad kdew shai ha katei ka kaiphod (report) namar katkum ka jingiohi lyngba ki lad pathai khubor ba ia katei ka kaiphod (report) bala phah da u Justice (retd) T Vaiphei la sealed bha ha kawei ka packet ha haba u Chief Minister ka jylla U Conrad Sangma ula phah kylla pat sha ka Political Department ban pule bniah ia katei ka kaiphod, ong ka kyrwoh na U bah Dundee Cliff Khongsit, Working President, FKJGP Central Body.