Ladep phah ia ka kaiphod kam nonghikai Yn pynshitom kum ka jingai jingmut ka Committee:CS

Shillong, 20 Nailur:
U Chief Secretary ka Jylla u bah WMS Pariat u la pynshai ba ia ka kaiphod tohkit halor ka kynrum kynram thung nonghikai LP skul la dep phah sha ka sorkar da ka High Lever Scrutiny Committee (HLSC).
U la iathuh ba ia ka kaiphod la dep submit sha u Principal Secretary jong ka tnad pule puthi bad ka don bad ka sorkar.
Haba kylli kaei ka jingpynshitom ka sorkar kan shim pyrshah ia kito kiba donkti halor kane ka kynrum kynram thung kam nonghikai, na ka liang jong u Chief Secretary u la ong, yn sa leh katkum ka jingai jingmut jong ka committee.
Na ka liang jong u Chief Secretary um shym la batai satia halor kiei ki jingai jingmut bad kiei ki jingai jingmut jong kane ka committee kaba la tohkit bniah biang halor kane ka kam.
U la iathuh ba na ka liang jong ka sorkar kan sa phah sha ka iingbishar halor kiei ki kam kiba ka sorkar kan leh ia kiba donkti halor kane ka kam.
U ong ia mynta ka sorkar kam pat phah ia ka kaiphod sha ka iingbishar namar ym shym la buh tarik satia lano ban phah sha ka iingbishar halor ki kam kiba ka sorkar kan leh pyrshah ia kiba donkti ha kane ka kam thung nonghikai.
Lah ban pynkynmaw hangne ba kham mynshuwa u Public Information Officer (PIO), jong ka tnad pule puthi haba jubab ia ka kong Agnes Kharshiing kaba pan RTI halor kane ka kaiphod u ong ba um tip shaei ka don bad um tip hano la aiti ia kane ka kaiphod.
Lah ruh ban kdew hangne ba na ka liang jong ki samla wad kam nonghikai skul ki la kynnoh ba ka la don ka jingleh thok bad pyndam sia lieh ia ki katto katne kiba dei hok ban ioh ia ka kam nonghikai ha kaba ki la ujor syndon sha ka iingbishar.