Lada ym thied ruh kin kynnoh, lada thied ruh kin kynnoh, ong U MR

Shillong: U Myntri rang bah ka jylla, u Conrad K Sangma, myn hynnin ka sngi, haba ia kren bad ki lad pathai khubor u la ong ba  lada don kino kino ki bym hun ia ka jingpynshai jong ka sorkar jylla ha kaba ia dei bad ka jing pynlut ha kane ka jingiakhun pyrshah ia ka COVID-19, ki lah ban pan da ka RTI.

U myntri rang bah ka jylla u la ong ba bun ki jingpynlut ki long na ka bynta ban pynkhlain ia ki jaka ai jingsumar ha baroh ki District jong ka jylla bad kine kim dei ba tang na ka bynta ka jingpang COVID-19, hynrei ki dei kiba donkam bad ia kine ruh la khein lang ha ka jingpynlut ha ka COVID-19.

U la ong ruh ba ka jingthied ia ki Ventilator  ki long kiba don kam bad kine kin don ha ki jaka ai jingsumar shirta, ka jingthied ia ki kali Ambulance kane ruh la pynrung ha ka jinglut ha ka COVID-19 bad kine ruh kin sah na ka bynta ka jingmyntoi jong ki paidbah ha kaba kit ia kiba pang ba shitom.

U Myntri rangbah u la ong ruh ba ka sorkar jylla ka la ai jingiarap ruh ia ki nongbylla, na ka bynta kito ki sngi kiba ki duh bylla bad kane kala kot sha ka T.51 klur ha kaba kiwei ki jylla kim shym la leh kumba leh ka jylla Meghalaya.

U la ong ruh ba ka sorkar ka la buh ia ki Corona Care Centre,ha kaba ka sorkar kam shem la lah ban pynbiang ia ki kum ha ki Five Star Hotel, hynrei ka sorkar ka la ialeh katba ka lah ban pynbiang.

U la ong ruh ba lada ki don kino kino kiba dang kwah ban ioh jingshai shuh shuh ki lah ban pan da ka RTI, ha kaba kin sa ioh lut ia ka jinglut jingsep baroh ha kaba ia dei bad kane ka jingiakhun pyrshah ia ka khlam COVID-19.

U la ong ruh ba kane ka jingiakhun pyrshah ia ka khlam Covid -19 kam dei tang ka jingia khun jong ka sorkar marwei, hynrei hap ban ia treilang da baroh ki nongshong shnong kane ka jylla.

Haba ia dei bad ka jingbuh dor jong ka sorkar mynta ia ki bai test, kane ka long katkum ka dor iew, kam don jingioh nong ia ka sorkar, hynrei ka sorkar ka pynlait ruh ia kito ki long iing kiba duk kiba don ia ka BPL Card.

U Myntri rangbah u la ong ba lada ka sorkar kam thied ia ki jingdonkam kin sa kynnoh ba ka sorkar kam shem thied; katba haba ka sorkar ka thied ruh ki kynnoh  balei ka lut, hynrei na ka liang jong ka sorkar kan ialeh ia kaei kaei kaba bha tam na ka bynta u paidbah.