Nongpoh:Ka dei ka jingshisha ba ha man ba ka sorkar Assam, ka wan ban pynpoi ia ki kam pynroi kum ki surok ha ki shnong khappud kiba don ha khappud ka Megha laya-Assam, la ju mih beit ka jingpyrshah na Meghalaya, la ka long na ki kynhun Seng ne wat na ki nongmih khmat paidbah (MLA/MDC) ha ka jylla, hynrei ka long pat ka jingshisha ba ha ka por ba ki leit ban jurip ia kito ki shnong Khasi, kiba don ha khappud, ki hap ban pyndonkam lyngba ki surok ba shna ka sorkar Assam, namar ki long kiba bha bad suk ka leit ka wan bad nalorkata ka long ba kim don ia kita ki surok ba shna hi da ka sorkar Meghalaya.
Iano yn bein, iano yn kynnoh bad mano ki ban sngewthuh halor ka jingeh kaba la kynduh da ki paidbah kiba sah ha khappud, namar lada phai sha ki shnong khappud kiba don ha Ri Bhoi, kata naduh ha ki thain Block-II, ki thian Khanapara ter ter shaduh Umtyrnga bad sha ki thain Balakhwa, la iohi ba lap ba jin lada ym dei lyngba ka jingpynpoi surok ka Assam, ki shnong kiba don ha kitei ki thain, kim ioh ia ki lynti syngkien kiba biang bad katno tam haba iadei bad ki surok iaid kali.
Nyngkong eh haba phai sha ki shnong kiba hap hapoh ka Raid Nongtung bad kaba ki paidbah ki tip kum kita ki shnong khappud kiba don ha Block-II, na Khlieh Umwang sha Madan Umwang, Sabuda, Jatalong ter ter shaduh Umlaper bad sha Ummat, la lap ba ia ki surok kiba kongsan tam na ka bynta ka leit ka wan ki paidbah ha kitei ki shnong, la shna pynbha lut da ka sorkar Assam, hynrei na ka sorkar Meghalaya ki ioh tang ia ki skim barit baria bad haba iadei bad ki lynti syngkieng, kaba heh eh ka dei tang ha ki surok shnong, kata kaba la shna lyngba ka skim MNREGS.
Ka la long kumjuh wat ha kito ki shnong khappud kiba don na Khanapara ter ter shaduh ki thain Umtyrnga, kaba hap hapoh ka Raid Marwet, ha kaba lada peit ka jingiapher hapdeng ki shnong kiba don ha ka liang Assam bad Meghalaya, ki la iapher bak-ly-bak, namar kito ki shnong kiba don ha ka liang Assam ki don ia ki lynti synkieng kiba biang, katba kito ki shnong kiba don ha ka liang Meghalaya, kim don don ia kita ki lynti syngkien kiba biang bad ka sakhi kaba shai eh, ka dei hapoh ka shnong Pillangkata, Maikhuli bad Barapathar ruh kumjuh, ha kaba ki surok hapoh kitei ki shnong khappud ki la sniew tasam eh bad ym tip na kaei ka daw, ba kitei ki shnong ha khappud kum ioh ia ki surok kiba biang.
Lada phai lei lei sha ki thain Balakhwa, kaba hap hapoh ka Hima Nongspung, la iohi ba katei ka thain kam don wat kawei ruh ka kam pynroi kaba ka sorkar Meghalaya, ka la leit pynpoi sha katei ka thain bad kaba lah ruh ban ong, ba jin lada ym dei lyngba ka jingpynpoi surok rong ka Assam, kaba mut ba ki briew kiba sah ha pud u sam ka Meghalaya bad kiba sah katei ka thain, ki jynjar eh ha ka leit ka wan bad katno tam lei haba don ki kam kiba kyrkieh kum ha ka pang ka shitom lem bad kiwei.
Ha u snem 2019 ki katto katne ki seng na Meghalaya, ki la pynpaw ia ka jingpyrshah kaba jur eh halor ka jingpyntrei ka Assam ia kawei ka surok PMGSY bad khamtam eh ia ka Jingkieng kaba pyniasoh ia ki shnong na Assam sha Balakhwa, hynrei ka Assam ka pyntrei beit khlem sangeh satia, ha kaba ka la lah ruh ban tei syndon haduh 2 tylli ki Jingkieng heh, pynban kumba ka long mynta lei, la jan baroh ha ka thain Balakhwa, ka Assam ka la shna pynbha lut ia ki surok bad kaba la pynsuk eh ha ka leit ka wan ki paidbah kiba sah ha katei ka thain.
Kumba ka long mynta, hapoh ka shnong Balakhwa, ka Assam ka la pynpoi ia shibun ki kam pynroi bad ha man ban ka pynpoi ia ki kam pynroi, ka da sieh artad bad ki Signboard, kaba pynpaw ba ia kitei ki kam pynroi, la wanrah na ka sorkar Assam.
Ka long ruh ka jingshisha, ba kito ki briew kiba sah ha khappud kim ju kham kwah ban leit pyniasoh ialade sha Assam, hynrei namar ba ki la shah ieh meinah palat ha ka sorkar Meghalaya, kaba la pynlong ia ki ba kin pdiang beit ia kino kino ki kam pynroi kaba wanrah da ka Assam, namar lada kim pdiang ruh kin sa kynduh shibun ki jingeh khamtam eh haba iadei bad ki lynti Syngkien.
Ki briew kiba sah ha Balakhwa, ki pynpaw ba lada ka sorkar ka kwah ban iada na ka jingkyntur pud ka Assam, ka Meghalaya ka sei ban theh buk buk ki skim pynroi sha ka thain. Ki la pynpaw ruh ba ki jingdonkam ba hakhmat eh ha ka thain Balakhwa, ka dei ban ioh ia ka bording kaba thikna, ki jaka pule puthi, ki jaka sumar paidbah, ki Bank lem bad shibun kiwei de ki jingdonkam, nalorkata ki lah ruh ban pynshai bin pa bin halor kitei ki jingdonkam ba hakhmat eh.
Phi don ban ong eiei?