Lada ym iabeit, lah ban mih ka HSPDP (Ardent) bad ka HSPDP (Hoping)

Shillong, 8’lyngkot:
U Rupang u la ioh ban ia kynduh bad kiba bun bah ki riew rim jong ka seng HSPDP ban ia kren ia ka jinglong jingman katei ka seng kumba ka paw ha kine ki sngi mynta, kiba bun ki riew rangbah bad ki riew rim katei ka seng ki la pynpaw ka jingsngewkhia ban iohi ia katei ka jingjia khamtam ka jingbehseng khah khah ia ki nongialam. Bun na kitei ki riew rangbah kiba la ia kren ki dei kiba la don da ki phew snem hapoh katei ka seng saiñpyrthei kaba la seng da u bah Hopingstone Lyngdoh (bam kwai ha dwar u blei).
Bun na kitei ki riew rangbah ki dei kiba ym shym la kheiñ briew shuh ia ki ha ka seng HSPDP (kumba ki la iathuh hi) naba don kiba bat ha ki shnat treikam bapher bapher hynrei la pynduh pyndam noh mynta ia ka shnat treikam ba ki bat hynrei kitei ki la ong ba ki ieit ia ka seng HSPDP bad ki thmu ban pynbhabriew ia ka bad na kata ka daw kim pat leit ia soh bad kino kino ki seng saiñpyrthei. Kitei ki riew rangbah ki la ong ba mynta kim kwah ban leh shongshit lane ban rai shongshit hynrei ki dang ia syllok para ma ki (riew rim) kiba la shah beh seng bad kiba la shah pynduh pyndam ia ki tnad treikam jong ki bad hadien kin shim ia ka rai kumno ban leit ia syllok ia ki nongialam ba mynta katei ka seng.
La iathuh ba lada katei ka jingiasyllok kam poi shano shano ruh , ka lah ban mih sa kawei pat ka HSPDP bad kata kan dei ka HSPDP jong kita ki riew rim kiba ju bud ia u bah Hoping bad kiba ju ia don ha syndah jong u kaba ki lah ruh ban khot kyrteng da ka HSPDP (Hoping).
Katei ka kynhun kaba don ia katei ka jingthmu ban wanrah ia ka jingiapynbeit la iathuh ba ka don ka jingthmu ban lum lut noh ia baroh ki briew kiba la mih bad shah beh na ka seng HSPDP ban ia kren sngewthuh khnang ban pynkhlaiñ ia katei ka seng.
Haduh mynta la sngewthuh ba katei ka jingthmu ka dang sah ha suiñ bad ym pat lah ban pyndep naba ki dang ia saiñdur, hynrei la sngewthuh pat na ka jingiakren ba lada ym lah ban pynbeit lane ka HSPDP hapoh ka jingialam u bah Ardent Miller Basaiawmoit kum u President kam pdiang khlem pep ka lah ban mih ar tylli ka HSPDP ka HSPDP u bah Ardent bad ka HSPDP ki nongbud ba ha syndah u bah Hoping.