Lada ym don syrnot shah injek, yn duh iarap na ka sorkar, kynnoh ka AIM

Shillong:Ka kynhun Awaken India Movement (AIM) Meghalaya State Unit, myn hynnin ka sngi ha ka 27 Tarik Iaiong 2022 ka la hiar shapoh ka Shnong Umsning bad ka la pynlong ia ka jing ialang Paidbah ha ryngkatlang kiba bun ki paidbah Nongshong Shnong jong katei ka thaiñ Umsning, Ribhoi District kiba ladon ryng kat lang ban sakhi.

Ka AIM Meghalaya ka la iaid shakhmat ia ka jingialang lyngba ka jingpyniaid u dkhot jongka kynhun Bah Justin Kahit, da ka jingkren ba la shim bynta lyngba ki katto katne ngut ki dkhot jongka ha ryngkatlang u Chairman jongka kynhun Bah Banshai Marbaniang.

Ka jingpynlong ia katei ka jingialang, halor ka jingthmu jongka AIM Meghalaya State ban pynshai sha ki paidbah nongshong Shnong jong katei ka thaiñ halor ka jingioh sngew ia kiba bun ki jingeh ha kaba na kaliang jongki paidbah katei ka thaiñ, ki la ju pynsngew sha ka kynhun ia ki jingeh kaba ki iakynduh ha kaba iadei bad ka jingshah pynbor ban ai Tika covid kumjuh ruh ha kaban pynpoi ia ki syrnot injek covid, lym kumta kin duh ia ki jingiarap napoh ka Sorkar.

Ka kynhun AIM ka la pynshai halor kiba bun ki bynta ha kaba iadei bad ka jingim laitluid kumba la im halor ka Ri Synshar Paidbah khlem da don kano kano ka jingshah thombor. Ka AIM ka la pynsngew paidbah halor ka Hok bad ka jingshisha katkum ka Jinglaitluid kaba dei ban im na ka bynta ka jingwan thombor jong ka Khlam Covid-19 ha ki bynta bapher bapher hapoh ka pyrthei baroh kawei.
Ka kynhun AIM kumba la paw naduh kaba sdang jong ki snem ba la leitnoh ka la mih shakhmat ban pynshai ha baroh kawei ka Ri India, khamtam hapoh la ka jong ka Jylla Meghalaya, halor ka jingshah pynbor bad jingshah ban beiñ ki paidbah nongshong shnong jong ka Jylla, na ka bynta ban shim ia u Injek Covid tika jong ka Khlam Covid-19.

Ka AIM, ka la pynpaw ruh halor ka jingshim kabu jong ki Hospital Sumar jingpang naduh ki Hospital Private, haduh Hospital Sorkar, ha kaba pynkiew dor khlem da tip shuh halor kaei ka bynta ban sumar katkum ka jingpang pynban da kaba la shu pynkylla kum ki nongpang Covid Positive.
Ka AIM, ka la pynpaw ruh ba kine ki sngi hadien ka jingwan kane ka Khlam Covid-19, kaba la shu kylla long tang kum ka lad ban pynkiew dor ia ki mar ki mata kynthup naduh ki marbam mardih bad kiwei kiwei ki bynta.

Ka AIM ka la pynpaw ba kam shym la ieng ban ialeh pyrshah namar ban shim ia u Tika covid vaccine, hynrei ka la pynpaw ba kum ki Paidbah Nongshong Shnong kiba im manla ka sngi kidei ban ioh ia ka jinglaitluid ymtang hapoh Meghalaya hynrei ha baroh ki Jylla bapher ka Ri India.
Ka AIM ka kyntu jur ia ki paidbah jongka thain Ri-Bhoi ter ter haduh ka thain Umsning khamtam naduh ki Nongshong Iew, Nongbylla Sngi, Nongrep, Nongtreikam Sorkar, bad kiwei kiwei ruh kumjuh barohlang da shisha ba kum ki paidbah kiba pyrkhat lem ia la lawei jongka pateng, ka ban wan ban mih shakhmat da jingiatreilang kum kawei ka nongrim da jingiatylli na bynta bantei ia ka nongrim kum ki briew ba dei ban im laitluid.
Ka seng ka kyntu ia ka Sorkar Jylla, ba kam dei ban long mawjynthut ne long diengpyngkiang na bynta ka hok jongki paidbah nongshong shnong kiba dei ban ioh ia ki jingiarap bapher bapher, khamtam eh na bynta ki longïing kiba duk.

Ha katei ka jingialang la kren pynkut da u Chairman ha kaba iadei bad katei ka jingialang paidbah, namar ka dei ka hok jong manla uwei pa uwei u nongshong shnong uba im hapoh ka Ri synshar Paidbah da jinglaitluid katkum ka Fundamental Rights jongka Riti Synshar jongka Ri India (Indian Constitution) bad lada don kiba pyrshang ban pyndonkam politic, kata ka mut ki la pyrshang ban pynlong mraw ia la kajong ka Ri bad ka Jaidbynriew baroh kawei da kaba ki ieng ialeh pyrshah ia ki aiñ ki kanun bapher bapher kiban shakri ia baroh jongka imlang sahlang.