“Lada u RS um donbor, nga lah ban ong ba nga la thied ia ka Dorbar Hall”

Shillong, 25’lyngkot:
Ha ka jingialang jong baroh ki Rangbah shnong kaba la khot da ka Hynniewtrep Youth Council, kaba la long ha ka sngi saitjain jong ka taiew, ha Khasi National Dorbar Hall halor ka phang ka jingshah sloit bor noh ki Rangbah shnong katkum ka hukum ba la pynmih da ka high Court, kiba bun na ki rangbah shnong bad ki nongmihkhmat jong ki shnong ki la pynpaw ia ka jingpyrshah jong ki, ryngkat ki nia ki jutang kiba ki la sei ha katei ka jingialang.
Uwei na ki riew rangbah uba la mih khmat ia ka shnong nongrim hills uba dei ruh u General Secretary katei ka shnong u bah B.L Nari, haba kren kum uwei na ki riew rangbah u la ong “Ka hukum jong ka high Court ka dei na ka jingioh thiah jong ngi, namarba kane kam dei shuh ka sien kaba nyngkong, hynrei mynta kane ka hukum ka dei ka jingkyrsiew thiah ia ngi’.
U bah Nari u la ong ba ka jingmih jong katei ka hukum ka dei namar ba ka don ka bor kaba na shalyndet , “ka jingthmu ba nyngkong eh ka dei ban knieh ia ka synshar khadar, ka khyndew ka shyiap bad ym slem ka jylla jong ngi kan sa kylla kum ka jylla Tripura” ong u bah Nari.
Haba kren ia ka bor jong u Rangbah shnong, u bah Nari u la ong ba ym don kiwei pat ki bor kiba kham khlain ia u Rangbah shnong ha ka synshar khadar jong u Khasi hapoh shnong poh thaw hynrei ha kine ki sngi u la ong ba la shu pyndonkam ia ki Rangbah shnong kum kita ki tiar ki tar tang haba donkam. “Lada ka bor jong ka Dorbar shnong ka iap, tang hapoh 10 snem yn jia aiu ia ka jaitbynriew”, ong biang utei u rangbah.
Shuh shuh u la ong “Lada u Rangbah shsnong um donbor shuh , nga nud ban ong ba nga lah ban shna sertiphiket dalade hi tang da ka jingiasngewthuh jingmut bad lai-ngut ki para marjan ba nga la thied ia kane ka Khasi National Dorbar Hall, mano pat ban pynshisha haba ki marjan ki la dep pynshisha, u rangbah shnong ruh um donbor shuh”, pynkut utei u rangbah.
Uwei pat u rangbah uba la mih khmat na ka shnong Mawkhar u Dr.B.P.S Roy haba kren ha katei ka sngi u la ong, ‘Ym slem tiak shi tiak kan poi ka por ba yn sa pynkylla lut wat ha ka shongkha shongman ruh bad ha kaba kut ngin sah sa tang ka shynrong, katba nangmih ki por wat ia ka bor ka Distrik Council ruh la nangsloit nangsloit’, utei u rangbah ruh u la pynpaw ka jingbym sngewpyrshah ia ka rai jong ka high Court. Ki la don bun ngut ki riew rangbah kiba la mihkhmat ia ki shnong bapher bapher kiba la sei ia ki jingkren jong ki ha katei ka sngi.