Lada u myntri pule puthi, um pan map, yn risain lut ki nonghikai, ong ka MSSASA

Shillong: Ki nonghikai SSA, hynnin ka sngi, ki la byrngem ban ia resain paidbah, lada U Ma Lahkmen Rymbui, myntri pule puthi ka sorkar Jylla, um treh ban pan map, halor ka jingkren pyrshah jongu, ia ki nonghikai bad ki dawa, ba u dei ban pan map mynta ka sngi palei.

Ki nonghikai ha ka la lama jong ka Meghalaya SSA Schools Association (MSSASA), ki la pynpaw ia ka jingsngew pyrshah kaba jur, haba U Ma Rymbui, myntri pule puthi, ula byrthen, ba ka sorkar, kan leh tyngeh ia ki Managing Committee, lada jia ba ki nonghikai, kim leit phai noh mar mar sha la ki jong ki skul jongki.

Ki don mynta 6,000 ngut ki nonghikai, na ka jingdon kaba 12,541, kiba thiah ha surok, la lai sngi kynthih, kum ka dak jong ka jingiakhih jongki, ban dawa na ka sorkar jylla, ba kan siew noh ia ka tulop jongki, kaba san bnai kynthih.

U Ma Aristotle C Rymbai, President ka MSSASA, u ong “Ngi phah ia ka khubor, kaba shai sha U Ma Rymbui, ba u dei ban pan map noh mardor, lane ngin hap ban resain noh baroh, na ki kam jongngi”. U Ma Rymbai, u ong ba ki nonghikai, kim shym la wan satia sha surok ban ialeh kmen, hynrei, ki thiah, ha kine ki lai sngi ba ladep, namar ba ka sorkar jylla, kam shym la shah shkor satia, ban siew ia ka tulop jongki, kaba san bnai kynthih.

“Kumta sngewbha wat pynbor iangi, ba ngin ia resain lut baroh, namar ba lada ki 12,541 ngut ki nonghikai ki risain, kumta ka tnat pule puthi ha Meghalaya, kan sa khyllem” ula ong shuh shuh.

U Ma Rymbai, u ong ba ki nonghikai SSA, ha ki hynriew bnai ba ladep, ki la iai shah shitom, ha ki jingkular, ba tang ka ktien jong ka sorkar jylla, khamtam ia u myntri pule puthi ka sorkar jylla; hynrei ka jingkren jong u myntri, ka la pyndiaw mynsiem shibun ia ki nonghikai.