“Lada u Jisu um shym la mihpat!”

AIS Suja

 

 

Lada u Jisu um shym la mihpat, kata ka mut ba ki Khristan ki la ialam bakla ia ki billion ngut ha kane ka pyrthei mynta, kata 2000 snem tam mynta.
Kaei kaba u Apostol Paul u ong? To ngin ia peit – “Lada ia u Khrist ym shym la pynmihpat, te kumta ka jingialap jong ngi ka long kaba lehnohei, bad KA JINGNGEIT jong phi ruh kaba lehnohei. Nalor kata ruh yn khot ia ngi ki nongsakhi lamler shaphang u Blei namar ba ngi iaphla shaphang u Blei (shaphang u Jisu Khrist) ba u Blei u la pynmihpat ia u Khrist, ia uba um shym la pynmihpat” 1 Corinth 15:14-15.
Katto katne, ki ong ba uta u Jisu um shym la mihpat, u dei u briew, u la iap te u la iap khlem mihpat, bad kane ka rukom ong ka jia wat mynta ruh ba ngi sngew dalade.
Te kumta, lada ia u Khrist ym shym la pynmihpat da u Blei, ka long lehnohei ka jingialap ia ka Gospel u Khrist lyngba da ki bun ki lad ki lynti lyngba ki Media bapher bapher khamtam ha kane ka juk thymmai, bad ba kata ka jingngeit jong ngi ruh kaba lehnohei, kumba ong u Apostol Paul, bad yn khot ia ki Khristan ki nonglamler Blei ba lada ia u Jisu ym shym la pynmihpat!.
Hynrei ngi nud ban phla ba u Jisu u la iap na ka bynta ki briew baroh ka pyrthei bad ba u la mihpat. Ki don shibun bah ki sakhi ba u Jisu u la iap bad ba u la mihpat.
Haba ki kynthei, ka Mari nong Madala, ka Mari ka kmie u Jakob bad ka Salomi ki la leit sha kata ka jingtep, haba ki la bsut, ki la iohi arngut ki rangbah ha ki jainkup phyrnai, bad ki la ia sheptieng artad. Kita ki rangbah kiba dei ki angel ki ong – “Balei phi wad ia uba im hapdeng kiba iap? Um don hangne, u la MIHPAT. Kynmaw kumno u la ong ia phi mynba u dang don ha Galilaia” Loukas 24:4-7 / Markos 16:1-6.
Hangne nyngkong, la sakhi da ki angel jong u Blei ba u Jisu “U la mihpat”, bad kumjuh ruh da kito ki kynthei. Kiwei kiwei ruh ki iohi ia u Jisu hadien ka jingmihpat jong u ba u ia bam, u iaid bad u kren. Ha kaba khadduh, la iohi ruh ia u da ki 500 ngut ki synran.
Lada tang katne kiba la iohi lehse ki briew kim ngeit, hynrei u Blei u la leh da shibun ki kam phylla (wonders) ba ki briew kin tip bad kin ngeit ba uta u Jisu uba la iap, u la mihpat.
Ha kane ka juk jingstad saian, u Blei u pynpaw ruh lyngba ka science ba la shem ba uta u Jisu uba la iap ba la tep ia u ha ki jain linen bani ka jingmong ha ka met hynrei ba u la mihpat.
Kumta, shibun bah ki sakhi ki pynshisha ba u Jisu u la mihpat. Balei ki briew kim ngeit ne ki dang artatien? Lada ia u Khrist ym shym la pynmihpat, ki briew ba la iap ruh kin ym mihpat. “Te lada ia u Khrist ym shym la pynmihpat, ka jingngeit jong phi kaba thala, bad phi dang sah ha ki pop jong phi” 1 Korinth 15:17. Ka mut lada u Jisu u khlem mihpat shuh, te ym don uta u nongbah ia ki pop, namar ba u Jisu u la iap na ka bynta ka pop ki briew baroh bad ba u la im pat sha ki bymjukut.
Haba u Jisu u la dep mihpat, ym shym phong shuh ia ka met ba kynja doh, u phong da ka met ba kynja mynsiem. Namar, “Kumba don ka met ba kynja doh, don ruh ka met ba kynja mynsiem” 1 Korinth 15:44. Dei na kata ka daw ba u Thomas u ong ia kita kiba la iohi ia u Trai, da ka ba ong – “Lymda ngan iohi ha ki kti jong u, ia ki dien jong ki prek, bad buh ia ka shynriah ti jong nga ha ka dien jong kita ki prek bad buh ia ka kti jong nga de ha ka krung jong u, NGAN YM NGEIT”. Hynrei u Jisu u la ong ha u Thomas – “Wat long te u bymngeit hynrei uba ngeit”. Ong u Jisu – suk ki bym shym la iohi, bad kiba ngeit pynban” Ioannis 20:24-29.
Kumta, ym baroh kiba iohi ia ka jingmihpat u Jisu, hynrei da ka Jingngeit ngi tip ba u Jisu u la mihpat, da kaba ngeit ha ka ktien u Blei kein.
Namar kata, ki briew baroh ki donbok kein namar ba u Jisu u la iap na ka bynta ki briew baroh ban siewspah ia ka pop na u soitan, bad ba u la mihpat bad u la kiew sha bneng nalor u lum ki Olives.
Kumta, u Jisu, u la iap, u la mihpat, bad u la kiew noh sha bneng ha u lyoh. Bad ka khubor hangne kaba ai jingkyrmen ia ki briew baroh, dei namar ba u Jisu uba la kiew noh sha bneng, un sa wan pat ha kajuh ka rukom ha u lyoh bad un hiar halor u lum Olives pyrshah Jerusalem. Ki kam Apostol 1:9-11 / Sekharaiah 14:4-5.