‘Lada u hymmen ne para, ka ain ka dei ban leh beit’, ong u bah Kyrmen

Shillong: U myntri ka tnad Social Welfare ka jylla u bah Kyrmen Shylla, u la ong ba ka ain ka dei ban leh ia kaba donkam khlem da shah shiliang ia uba heh ne barit.

Kane ka jingkren u myntri ka long hadien ba katto katne ki nongthoh khubor mynta ka sngi ki la ioh ban kylli halor ka jingpaw kyrteng bad shah kynnoh u hymmen jongu, bah Bison Shylla, ba shalan dewiong beain dang shen ha thain Jaintia Hills.

“Ngam tip ba i leh ne em ia kane ka kam, hynrei kum u myntri nga sngew ba uno uno uba leh ia ka kam beain, ki dei ban pynshitom”, la ong u bah Kyrmen.

U la ong ba u la ioh iakren ia u hymmen halor kane ka kam bad u la iathuh ba kam don satia ka jingleh kumba la kynnoh ban khaïi dewiong beaiñ.
“Nga la kylli na I, la i leh shisha ne em, hynrei i la ong khlem leh”, la ong u bah Kyrmen bad bynrap, ‘Lada mano mano ba leh ia ka kam beain, nga pynrem jur bad ka ain ka dei ban leh ia ka kamram’.

U la kyrmen skhem ba un nym leh ia kane ka kam. “Ka ain ka dei ia baroh, lada dei u hymmen ne para jong u myntri ne uno uno”, u la ong.
Ha kajuh ka por, u bah Kyrmen u la ong ba u dang pan kaiphod ruh na ki pulit halor kane ka jingjia bad hadien ba la ioh ia ka kaiphod (report) na ki pulit, yn sa tip ia kaba dei ne kaba lait.“Ngi dang pan report na ki pulit”, la ong u bah Kyrmen.