Lada u Bah Hek u ong ka BJP ka pyrshah Khristan, balei u pynïasoh, kylli U Bah Sanbor

Shillong:”Haba ïadei bad ki khubor ba la mih shaphang ka jing ïa lang ha Orchid Lake Resort, Umiam ha ka 6 tarik mynta u bnai, 22, nga kwah ban pynshai ba ka prokram ha katei ka sngi kadei kaba khlem don jingthmu lypa bad ka dei kaba la batai bakla,” ong u MLA bad Myntri ka sorkar jylla u Bah Sanbor Shullai.

U la ong ba un ïakren shimet bad u Lamphang ka Ïing Dorbar Thawaiñ bad u Myntri Rangbah ka jylla, haba ïadei bad katei hadien ba la wanphai na Kolkata bad un panmap lada ka la long kaba pyn sngewsih ïano ïano ha katei ka jingïalang.

“Ka jingjia ka la bthei shabar bad ka wan kum ka jingkyn dit kaba khraw ïa nga ha kaba u paralok ka parti jong nga u Bah AL Hek u la pyrshang ban ïoh kabu saiñ pyrthei na katei ka jingjia,” ong u Bah Sanbor.

U la ong ba ka jingjia kaba hapoh ki saw kamra ka la leit kylla long paidbah. “Haba ïadei bad ki kam shah banbeiñ pyrshah ïa ki Khristan ba la pynpaw da u nongïalam ka UDP Bah Metbah Lyngdoh, nga shimet nga sngew ba ka BJP kam lah ban shah pynkitkhlieh na ka nalor ba kamdei ruh ka rynsan kaba dei ban wanrah kum ïa kitei ki mat ne phang. Ka kyrtong ïakhun President ka NDA ka wan hangne ban pan jingkyrshan bad ban wanrah ïa ki kam ki jylla ha ka jingïalang ka long shabar u laiñ bad kamdei ka por kaba donkam ha kaba kane kadei ka kam ai jingmut shimet jong nga,” ong u Bah Shullai.

U la ong ba lada ki mat ba la wanrah ki ïadei bad ka jylla Meghalaya, ka BJP Meghalaya bad ma u, u kloi ban ïeng na ka bynta kata.
“La ka long ïa u Father Sten ne kiwei ki mat nga ju ïai kren bad nga la rah ïa kane bad ki nongïalam ka SengKmie. Ngam don ki mat barieh ne lehraiñ na kino kino ki mat kiba kongsan khamtam haba kidei jong ka jylla bad ki paidbah,” u la ong.

U la ong wat ïa ka CAA, u la long tang marwei u MLA na baroh kawei ka thaiñ shatei lammihngi uba la ai jingmut shimet ïa ki nongïalam SengKmie ban pynlait ïa ka jylla Meghalaya kaba don hapoh ka jingïada ka sixth schedule. “Nga ïai ïeng bad baroh ki paralok ka MDA jong ngi lyngba kiba bun ki jingeh bad nga ïai ngeit skhem ha ka party jong nga bad u nongïalam ka MDA u Conrad Sangma,” u la ong.
U la ong ba kum shimet u pynrem ïa ki jingkren u Bah A.L. Hek bad dawa ban don ka jingpynshitom ban sdang da u state president ka BJP ha kaba la ïohi ba u la kren pyrshah ïa ka BJP party.
U la ong ba ka BJP ka don bynta bad ka sorkar MDA bad kyrshan ïa ka suk shongsaiñ bad ?asuk ki niam ha Meghalaya.
“Lada u Bah A.L. Hek bad kiwei ki ong ba ka BJP ka dei kaba pyrshah Khristan te balei kwah pynïasoh bad ka BJP,” buh jingkylli u Bah Sanbor.
“Kam shym don kano kano ka jingma ba la thmu lypa ne saiñ pyrthei naba nga burom ïa baroh ki paralok hapoh ka sorkar. Ka jingïadei jong nga bad ka UDP ka long kaba khlaiñ bha ban ïa kaba bun ki briew ki pyrkhat bad ka burom ka leit sha u late Dr Donkupar Roy uba long u nongïalam ha ka Saiñ pyrthei jong nga. Ka jingïadei jong nga bad ka NPP ka la kham Jylliew bad u late Purno A Sangma, uba long u nonghikai bad uba long barabor sha lyndet ki jingjop ka saiñ pyrthei jong nga. Sa shisien nga pynpaw ïa ka jingpanmap naduh mynsiem ha baroh kawei ka jingjia bad ïai banjur ba ki jingkynthoh jong nga ki long ha ka jingshisha ba ka BJP kadei ka seng laitluid niam bad kam ju kyrshan ïa ki kam pyrshah niam la kidei ki Khristan,” ong u Bah Sanbor Shullai.