Shillong, 13 Lber:
Ha ka kyrwoh khubor ba la pyllait paid bah mynta ka sngi ka HNLC ka la ai por shibnai ia ka sorkar jylla ban thung ksiang noh na bynta ka jingiakren ia suk hapdeng katei ka seng bad ka sorkar jylla bad katei ka shibnai kan sdang naduh mynta ka sngi ka 13 tarik u Lber,2016. Lada ka sorkar kan thung ksiang noh hapoh ka shibnai katei ka seng ka la ong ba kan ym khot pakhang shnong ha ka 15 tarik u nailar kaba dei ka sngi rakhe sngi laitluid ka ri India. Halor ki jingkren u myntri rangbah ka jylla u Dr.Mukul Sangma ha kine ki khyndiat sngi ha ing dorbar thaw-aiñ ka jylla ba ka seng HNLC ka dang donkti ha ki kam pynkheiñ aiñ da kaba khot pakhang shnong ha ka sngi Republic Day bad Independence Day ka kyrwoh na katei ka seng ka la ong ba ka jingkhot pakhang shnong kam dei ka kam pyntriem hynrei kam shym la donkti pat ha ki kam pyniap briew ne ki kamrahbor kumba long ha kiwei pat ki jaka ha kane ka jylla.
“Na bynta u myntri rangbah ka kham triem ka kam khot pakhang shnong ban ia ka kam pyniap bad ka kam rahbor” ong ka kyrwoh na u Publicity Secretary katei ka seng u bah Saiñkupar Nongtraw. Katei ka seng ka la kdew ruh ba kiwei pat ki kynhun seng lehnoh kiba dang iaid lynti ha ka jingiasuk bad ka sorkar la lap ba ki donkti ha ka kam rahbor,kamlute bad ka kam pyniap briew katba ia ka HNLC pat u myntri rangbah um lah leh eiei bad u khynniat beit sha ka sorkar pdeng. “Lada ka sorkar pdeng ka shem jingeh ngi ruh ngi don la ka jong ka tyllong ban ia kren beit beit bad u myntri kam pohing ka sorkar pdeng u Rajnath Singh ne u myntri rangbah duh ka ri u Narendra Modi” ong katei ka kyrwoh khubor. Ka kyrwoh ka la pynkut da kaba ong ba kan ap ia ka jubab na u myntri rangbah kaba un jubab lyngba ki ladkhubor.
Phi don ban ong eiei?