Ka Myntri kampoh iing ka jylla ka Kong Roshan Wajri ka la ong ba lada ki briew ki pynjot ia ki mar sorkar, ka mut ba ki pynjot ia ki mar jong ki paidbah namar ba la shna na ka pisa jong ki paidbah.
Haba kren mynta ka sngi, ha ka jingplie ia ka Mawryngkneng Police Station, ha Mawryng kneng ka Kong Roshan ka la kren tyngeh ia kito ki briew kiba donkti ban thang kali, thang iing thang sem kiba dei jong ka sorkar.
“Shisien ba la pynjot ia ki mar jong ka sorkar, kan long ka jingduh jing myntoi ia ki paidbah bad kan shem jingeh hi ia ki ban ioh biang ia ka pisa ban shna ophis, thied kali bad kiwei ki mar ki mata” la ong ka Kong Roshan.
Ka la ong ba ha ki 30 snem mynshuwa, ki kmie ki kpa ki tieng ban phah trei pulit, hynrei mynta da ki lak ki samla ki la mih bun ban aplai ia ki kam pulit.
Haba pynpaw ia ka jingsngewsih halor ka jingshah thang kali, ophis sorkar, ka myntri kam pohiing ka jylla, ka la buh jingkylli, kumno yn sneng ia ki khun haba dalade la pyni ka nuksa ba sniew.
Shwa ia kane, u Principal secretary (home) u KS Kropha u la pynpaw ba ka kamram ba nyngkong jong ki pulit ka long ban wanrah ia ka jingshngain bad ban leh da kaba tyngeh ia kiba pynkhein ain.
Katba u DGP u Bah Peter J P Hanaman u la ong ba wat la pynbun ki pyrton pulit katno katno ruh kan ym myntoi khlem ka jingtrei ryngkat bad ki paidbah nongshong shnong.
Lah ban kdew ba ia ka Mawryngkneng Police Outpost la plie ha ka 6 tarik u Nailar 1990, da u H.S.Chittaranjan IPS, Director General of Police, Meghalaya ha kaba la pynthymmai biang ha ka 08 tarik u Nailar 2007 bad mynta ka sngi ka shnong Mawryngkneng ka la ioh ia ka Police Station ba pura.
La tei ia kane ka Police Station ha ka jinglut kaba T.52 lak tyngka
Ia ka jingialang la pyniaid da u M.Kharkrang, Superintendent of Police, East Khasi Hills, Shilong, kiba la ai jingkren ha kane ka sngi ki long u Rangbah Shnong ka Mawryngkneng, u Bah Klin Kharsati, uba la dawa na ka Kongsan ba donkam ia ki pulit kynthei namar bun palat ki nongdie kiad ha kane ka thain.
U Bah David Nongrum u MLA ka Mawryngkneng u la ong ba kane ka shnong ka donkam ruh ia ka tnat pynlip ding (Fire Brigade) kaba ym pat don bad la ai khublei pynwai da u Vivek Syiem, ba long u SP (City) Shillong.
Phi don ban ong eiei?