Lada shimkhia ka sorkar, ka jylla kam donkam ban shim dohkha na shabar, ong u samla Aristone

Nongpoh:U Samla Aristone M Ryndongsngi, uba dei u nongialam jong kawei ka kynhun halor ki Dohkha, kaba la tip kyrteng kum Hynniewtrep Life Fish & Fish Seeds Supplier Association (HLF&FSSA), u la ong ba lada ka sorkar ka shimkhia ban pynkhlain ia ka kam ri Dohkha, kata da kaba pyndonkam ruh lyngba ki juk stad kiba mynta, ka jylla ka la lah ban pynbiang dohkha tang napoh ka jylla bad kam donkam shuh ban shanniah ia ka jingshalan na kiwei ki jylla.

Lah ruh ban kdew hangne, ba u Samla Aristone M. Ryndongsngi, u la dei uwei na ki samla uba don jingthmu shisha ban kyntiew ia ka kam ri Dohkha ha Ri Bhoi, nalorkata u dei ruh u samla uba la don ka jingshemphang ha ka kam ri Dohkha, kata lyngba ka jingpule jong u ha katei ka lain, ha kajuh ruh ka por u Samla Aristone M. Ryngdongsngi, u la ioh ia ka nam kum u nonglap ba thymmai ia uwei u jait Dohkha thli ha ka pyrthei.

Haba kren sha ki lad pathai khubor, na ka bynta ban pynshai paidbah halor ki nongrim bad ka jingthmu ka jingtreikam ka HLF&FSSA, u Samla Aristone M. Ryndongsngi, u la ong ba katei ka kynhun ka don ia ka jingthmu ban kyntiew ia ka kam ri Dohkha ha ka jylla bad ha kajuh ruh ka por ban pyniaid Iew ia ki Dohkha kiba pynmih na ka jylla (Local Fish) kata hadien ba u la lap ba ki don shibun ki bynta hapoh ka jylla, ki long kiba iahap bha na ka bynta ban ri Dohkha.

Utei u samla, u la ong ba ka HLF&FSSA, ka don ia ka jingthmu ban sam ia ki symbai Dohkha sha kito ki briew, kata da kaba pyndonkam, nalorkata ban ai Awareness sha ki Nongri Dohkha, ban pyniaid iew ia ki Dohkha na ka jylla, ban iarap kumno ban sumar ei haba don ki Dohkha ba pang lem bad kiwei.
Shuh shuh, u la ong ruh ba katei ka kynhun, ka don ia ka jingthmu ban plie lad ia kito ki samla kiba kwah ban trei kam lajong lyngba ka kam ri Dohkha, namar kumba ka long mynta hapoh ka jylla, ka jingdon ki briew kiba bam Dohkha ka bun bha, katba na ka jylla pat ka duna eh ha ka rukom pynmih Dohkha, ha kaba ia ka Dohkha ban bam ha ka jylla la shanniah na kiwei pat ki jylla.

Kiba la donlang ha katei ka sngi, ki kynthup ia u Bah Benedict Syiemlieh Vice-President, Bah HB Maring General Secretary lem bad kiwei pat ki dkhot katei ka kynhun.