Ka President jong ka Civil Society Women’s Organisation (CSWO) ka Kong Agnes Kharshiing ka la takrain ia ka jingtyrwa ka myntri sor ka Kong Ampareen Lyngdoh, ia ki briew ba shah pynpra ia ki iing ba kin leit sah ha iing baduk ha Nongmensong.
“Lada shah pynpra ka iing jongka, hato kan leit sah ha iing baduk?”, la kylli ka Kong Agnes pyrshah ia ka jingkren ka Kong Ampareen, bad bynrap, “Kumno kin leit sah ha katei ka iing baduk haba ki don la ka jaka ka puta ka iing ka sem, ki jingri jingdup.”
“Ka jingleh jong ka sorkar ban pynpra ia ki iing ki sem jong ki briew ka dei ka jingthombor jong ka, ka long kumba ka niewbein ia ki kynthei bad ka pyni ruh ba ki kynthei kim don ia ka hok ban ieng halor ka jingshisha”, la ong ka Kong Agnes Kharshiing haba iakren bad u Rupang mynta ka sngi.
Ka la bteng biang ban ther ia ka kong Ampareen, “Lada lur ia ka jaka jong ka bad phah sah ia ka ha kitei ki iing hato kan treh. Ngin ieng beit ban dawa ia ka hok”.
Ha kane ka sngi Thohdieng, ka sorkar ka la tyrwa ia kito ki briew ba shah pynpra ha Umawli, Mawtari, Mawlong ban leit sah ha iing baduk ba don ha Nongmensong hynrei na ka liang jongki, ki la kyntait ia kane ka jingtyrwa ka sorkar ha kaba ki la rai ban iakhun ban ioh biang ia ka jaka ba la shah knieh ha ka sorkar.
Ka Kong Agnes ka la kynnoh ba ka jingtuh ka sorkar ia ki jaka jong uba duk basuk ka long kumba kim dei shuh ki trai jylla namar ki trai jylla ki donkam ia ka jaka.
Haba kylli halor ka jingshah kem jong ka, ka Kong Agnes ka la ong ba ka jingkem ia ka, ka pyni ia ka jingtlot bor ki pulit bad ka jingthmu ban pynsngap jar noh ia ka jingiakhih ban dawa ia ka hok jinglong trai jongki ia ki jaka puta.
Phi don ban ong eiei?