“Lada shah beh kam u paralok phin risain lang”, ong ka Ampareen

Shillong, 20 Risaw:
Ka MLA ka East Shillong ka Kong Ampareen Lyngdoh ka la pynpaw ba ka jingphet seng jong u MDC ka Laitumkhrah u Bah Neil Antonio War ka long ka bym sngew dei tang namar ba u ieid bad kyrshan palat ia u Bah Pynshngain N Syiem kum u paralok.
Haba iakren mynta ka sngi, ka Kong Ampareen ka la ong, “Hato lada shah beh kam u paralok jong phi, phi ruh phin risain noh na ka kam?. Ka por kan sa batai”.
“Tangba ha ka ri synshar paidbah, kaba ai laitluid ia u briew, te, ka shong ha u (Antonio)”, la ong biang ka Kong Ampareen.
Ka la ong ba ka jingphet seng jong u Bah Antonio ka dei kaba shu syndet khlem kano kano ka jingkynjoh ktien sha ka, kum ka hynmen bad ka party kaba la pynheh pynsan ia u.
“U la phet hi khlem don ba beh, ha ka jingshisha, lada kwah ban phet bym sngew synnad shuh ia ki nongialam ka party, la dei ban leh kumba ma nga, ban leit phai biang sha u paidbah”, kala ong.
“Ha ka por elekshon ngi iatreilang, ngi ia durut, u khun ba la pynheh u shu mih lyndet, lehse ki don ka jong plan hynrei ngi sah ha ka umdum”, ka la bynrap.
Ka la ong ba kaba sngewsih ka long ba haba jop na kawei ka seng, leit phet sha kawei pat.
“Kum ka hymmen ka pait dohnud hynrei ngi sah umdum, ngi la sara hynrei da la seisoh, u long u para jong nga, u phet pynban”, ka la pynpaw. Ka la ong ba ka Block Congress ruh kam shym la ioh shithi eiei na u ba la phet seng bad la sah baroh mynta ha ka umdum.
Ha kane ka taiew, san ngut ki MDC ka Congress kynthup u Bah Antonio, Bah Hadrian Lyngdoh, Bah Banteidor Lyngdoh, Bah Albinus Lyngdoh bad u Bah Victor Rani ki la pynkut noh ia ka jingiadei bad ka party Congress da kaba ki la risain noh hadien ba u nongialam jongki, u Bah Pynshngain N Syiem u la shah sospen haduh lai snem ha ka party halor ki kam pyrshah seng jongu.