Shillong: U MDC ka Congress na Mylliem, u bah Ronnie V Lyngdoh u la ong ba lada u nongialam ka BJP na Assam u Himanta Biswa Sarma un ieng ban pyrshah ia ka Citizenship Amendment Bill (CAB), ma u ruh kum u briew ka Congress un leit rung lang ha ka shatri ka North East Democratic Alliance (NEDA) kaba ialam ka BJP.
Haba shim bynta ha ka jingiatai halor ka CAB ha iing dorbar ka KHADC mynhynnin ka sngi, u bah Ronnie u la ong, “Ka UDP kaba don ha ka NEDA, ong ia u Himanta ban pyrshah ia ka CAB bad lada u Himanta u pyrshah CAB, nga ruh ngan rung NEDA noh”.
Kane ka jingkren u bah Ronnie ka long ban kynthah ia ka UDP bad ka NPP kaba iadon lang ha kane ka shatri.
Hynrei u bah Bindo M Lanong uba la shim bynta ha kane ka jingiatai, u la pynshai ba ka NEDA ka dei ka rynsan ban iapyrkhat ia ka jingbit jingbiang ka dong mihngi bad ka UDP kawei na ki paralok ha kane ka kynhun, ka ju pyrshah ia ka CAB ha man ka jingialang ka NEDA bad ka pyrshah haduh kine ki sngi.
U bah Ronnie u la ong ba dei ban pyrshah jur ia ka CAB namar ba ka dei kaban pynjah klep ia ka jaitbynriew rit paid.
“Ngim dei ban shah ban pynlong ain ia ka CAB bad lada long ain ka CAB ngam tip lah ne em ban pyllait ia ka jylla. Ngim kwah ban kylla tang kum ki nongthoh dieng nongtong um jongno re ha la ka ri lajong”, u la ong u bah Ronnie.
U la ong ba lada kane ka ain ka long kam, ka jaitbynriew kan sa kylla rit paid ha kane ka jylla bad ka don ka jingthmu kaba sha jngai bha ka BJP ka long ban don kawei ka ri kawei ka jaitbynriew kawei ka niam.
“Ha ka ri India kaba don 125 klur, ngi don tang 15 lak ngut eiei. Katno ngut eh kiwei ki jaitbynriew lait na ki Hindu kiba sah ha ka Bangladesh kiba wan buhai shnong”, u la bynrap.
Phi don ban ong eiei?