“Lada phi phah da u bym nang hindi, 5snem phin shong lun ha Parliament”

Shillong:Ka kyrtong MP ka NPP na Shillong Parliamentary Constituency, ka kong Ampareen Lyngdoh ka la takrain ia u MP ka Shillong u bah Vincent H Pala ba um lah ban leh eiei ia ka jaitynriew, namar ba u iaid kum u hati saw kuna.

Haba kren ha ka jingialang bad ki nong kitkam bad ki nongtrei ka NPP Umsning Block ha Lad Sharai mynta ka sngi, ka kong Ampareen ka la ong ba balei ki paidbah kim iohi ia u MP namar ba u, u don la kajong ka seng, khlem don jingiadei bad ka sorkar bad ka sorkar pdeng. Ia ki MP lada ym jied hi na kajuh ka thymmei jong ka seng ha ka jylla bad ka ri, ym poi shano shano ruh.

“Lada long MP balei tang san klur, ngan wanrah 400-500 klur. Haba ngi kynthoh, wat sngewmong ba ngi kren ia ka mat. Balei phim iohi MP, namar ba u MP u don la kajong ka seng, khlem don jingiadei bad ka sorkar, ha ka jylla ruh ym don jingiadei bad sha Delhi lei kum ka duriaw. Ia ki MP lada ym jied hi na kajuh ka thymmei jong ka seng ha ka jylla bad ka ri, ym poi shano shano ruh”, ka la ong.
Ka la ther ruh ia kiba shu pynshongshit pynkhihwin ia u paidbah hynrei tang katto la pjah noh slam kum u nar. “Don kiba shu sngew ban khihwin ki iakhih bad lada pjah shu pjah kum u nar. Ki mat kim dei ban pynjah lynti ia ka thong jong ngi”, ka la ong ka kyrtong ka MP ka NPP.

Ka la ong ba ka NPP ka dei ka party na kane ka jylla, wat pynthame ia ki paidbah tang namar ba don u nongialam na kawei ka jaitbynriew. Ka la ong ruh ba lada ym don ka jingiatylli para Khasi, yn ym ioh ia u Myntri Rangbah na u Khasi bad kan ieng ban pyniatylli ia ki nongialam Khasi. Lada kwah ban phah ia u briew bym nang kren hindi, san snem yn sa shong atda ha parliament bad wat ong ba uta u MP um leh eiei, ka la ong.
“Lada phi kwah ban phah ia u briew bym nang kren hindi, san snem phin sa shong ‘atda’ (lun) ha parliament bad wat ong ba uta u MP um leh eiei”, ka la ong.

Ka la ong ruh ba la phrang ia ka ban kham eh kham jwat namar ba la hikai ha ka iing ka sem jong I pa jong ka bah (Late) Peter G Marbaniang u MP barim bad bah (late) Robert G Lyngdoh u myntri sorkar barim.
Ha kane ka jingialang la don lang u MLA barim bah Jason Mawlong, MDC Kong Macdalyn Mawlong, bah Samlin Malngiang uba peit ia ka Ri-Bhoi, bah Hamletson Dohling nalor kiwei.