Lada nud kem ia ka kong Ampareen, Deborah: HNLC

Shillong, 9 Lber:
Ha ka kyrwoh khubor ba la pyllait paidbah mynta ka sngi ka HNLC ka la kynnoh ba ki pulit ki kem tang ia ki rit ki ria ki duk ki rangli bad kiba tlot bor bad la pynngat jubor ia ki ha ki kyndon IPC bad UAPA hynrei kim nud pat ban kem ia ki heh ki haiñ bad ki riew saiñ pyrthei kaba ka kam jong ki ka la paw tyngkreiñ.
Ka HNLC ka la pynrem jur ruh ia ka jingkem ki pulit ia ka para jong u dkhot jong ka ka kong W Diengdoh tang na ka daw ba ka ia kren ha ka phone bad u hynmen jong ka. Ka la ong ba ki pulit ki saitkhuid da kaba kynnoh ba ki don ki jingshisha halor ka jingkem ia ka. Katei ka seng ka la pynpaw ruh ka jinglyngngoh ia ka jingkynjah ka kes u SI ka Patharkhmah uba la khlad noh u Peter J Marbaniang bad ka la kynnoh ba la pyniap im im peit peit ia u, hynrei ki pulit ki la kynnoh ba ka dei ka jingpyniap jong u ialade. Ka la ong ba ki pulit hi ki la pyndam ia baroh ki sabut kiba don ha katei ka jaka iap jong u.
Ka HNLC ka la kdew ruh ia ka bamsap ha ka tnad pule puthi kaba ki pulit kim shym lanud ban kem ia ka myntri sorkar ka kong Ampareen Lyngdoh kaba bat ia ka tnad pule ha ka por ba mih ka bamsap ha ka tnad pule. Ka la ong ba ki sabut ki sakhi ba biang ki la don ban kem ia ka kong Ampareen ha u snem 2013 lyngba ka jingphla u J.D Sangma Director barim ka tnad pule uba la phla ha u First Class Judicial Magistrate K.M Nongbri ba la pyndam ia ki mark jong ki nonghikai khnang ban pynrung ia ki briew kiba la ai kyrteng da ka kong Ampareen.
Nangta ka la dew ia ki kam jong ki heh pulit kaba la kynnoh ba u SI S.N Roy u la batbor ia ka khynnah kaba dang 13 snem karta ha kawei ka Hotel ha ka 17 tarik u Lber,2011 hynrei ia utei ruh ka HNLC ka la ong ba ym shym la kem, hynrei u la iaid ba heh pynban sharum shaneng bad u la kiew kyrdan ruh kum u Quarter Master ka Police Reserve.
Nangta ka la kdew ba u MLA ka ri Lum Garo u Jonathone Sangma u la ujor ia ka Deborah Marak ba ka la pyndonkam da ki lehnoh GNLA ban jop elekshon ha u snem 2013 hynrei ki pulit kim shym la nud ban kem ia ka. Katei ka seng ka la ong ba ia kiba heh ba haiñ ki pulit kim nud ban kem katba ia ki rit ki ria pat ki kem pynsted kumba kynrup skaiñ. Ka la ong ruh ba na ka por sha ka por ka la pynpaw ha ki kotkhubor ba ka kwah jingsuk, hynrei ki pulit ki pyrshah ia ka jingkwah ia suk jong ka bad ki ai ding pynban bad mynta ka la ong ba mynta ka dei ka sien ba khadduh ba kan ap, lada ka jingiakren ia suk kam urlong kan iaid noh da ki lynti jong ka jing ia umsnam.