Lada ngi kwah ban iada ia ka jaitbynriew ngi dei ban leh da kaba rieh: Macmillan

Nongstoiñ: Ka Seng Federation of Khasi Jaintia & Garo People, West Khasi Hills District, myn hynnin ka sngi, ka la ioh ban rakhe ia ka lyngkhuh snem kaba 30 jong ka jingiaid lynti jong ka Seng ha ka jingialang kaba la pynlong hapoh Vannie’s Hall, Pyndengrei ha kaba u Bah Macmillan Byrsat, MLA ka Nongstoin u ba dei ruh u Chairman jong ka Meghalaya State Law Commission (MSLC) u la long kum u kongsan katba u bah Wellberth Rani, President FKJGP Central Body u la long kum u Symbud kongsan.

“Lada ngi kwah ban ialeh ban iada ia ka jaitbynriew ngi dei ban ialeh na rieh ym ban shu ia pynpaw pyrthei lut khnang ba ki briew kiba mut ban hiar thma ia ka jaitbynriew kin nym tip ia ka jingthmu” ong u MLA ka Nongstoiñ u ba dei ruh u Chairman jong ka Meghalaya State Law Commission u bah Macmillan Byrsat haba ai jingkren kum u kongsan.

U bah Macmillan Byrsat u la kyntu ruh ia ki nongialam Sengbhalang bapher bapher jong ka District ba kimdei ban shu kwah tang ban paw pyrthei ha ki lad pathai khubor, hynrei kidei ban trei ia ka kam ka ba kren kham jam ban ia ka ktien bad u la ong ruh ba lada ngi leh ia kano kano ka kam ka ba bha u Blei un nym pynlehrain.
Shuh shuh u MLA ka Nongstoiñ, u la ong ruh ba kum ki nongialam Sengbhalang ha ka jingialynti kin iakynduh ia shibun ki jingeh bad ki jingshah kynthoh, hynrei u la kyntu ba kim dei ban sngap ia kiba kum kita namar ba ia u dieng ba mih soh ki bun ki nong kawang maw bad ha kajuh ka por u la ong ruh ba kum ki Sengbhalang, ki dei ban ia tylli ym ban ia sngew heh ne sngew khraw namar ha ka jaitbynriew Khasi ym don u bap oh bad u ba khraw bad baroh ki ia long mar katjuh.
Katba na ka liang jong u bah Wellberth Rani, President ka Seng FKJGP Central Body haba ai jingkren ha katei ka jingialang u la kyntu ia ki dkhot jong ka Seng ba kin trei shitom bad ban peit lem ia ka khia ka shon bad ka jingeh jong ki paidbah bad ban iarap ruh ia ki jingeh ba ki iakynduh bad ha kajuh kapor u la ong ba ha kaba iadei bad ka jingioh rung laitlan ki briew kiba na bar ym dei ban kynnoh tang ia ka sorkar hynrei u la ong ba kadei ka kamram jong ki Sengbhalang ki Rangbah Shnong ban khmih bniah bad khang lad ia ka jingwan rung kyrthlep ki briew kiba na bar.
Shuh shuh u la ong ruh ba kum ki Sengbhalang kim dei ban ia kob ne ia kwah bor hynrei kidei ban ia tylli khang ba ka jaitbynriew kan ym shah rkhie bein ha kiwei pat ki briew kiba na bar, ka Seng ka kyntu ruh ia ki nongialam ba kimdei ban pyndonkam bakla ia ka kyrteng jong ka Seng ha ki bynta ki bym dei hynrei kidei ban pyndonkam na ka bynta ka jingmyntoi jong u paidbah bad na ka bynta ka jingeh ba ka jaitbynriew ka iakynduh.
Kiwei kiwei ki nongkren ha katei ka sngi ki kynthup ia u bah Palwanbor Syiem President ka Seng FKJGP WKHD, u bah John Fisher Nongsiang President ka KSU WKHDU, u bah Dundee Khongsit General Secretary ka FKJGP Central Body bad kiwei kiwei.
Ha katei ka sngi na ka liang jong u bah Wellberth Rani, President FKJGP Central Body u la ioh ban pynbam sami bad pynskhem ruh ia ki dkhot bad nongkitkam kiba thymmai jong ka Seng FKJGP WKHD bad pyllait paidbah ruh ia ka sticker jong ka Seng katba ia ka Souvenir pat la ioh ban pyllait paidbah da u kongsan.