“Lada lap ia ka jaboh na kane ka Pump, sa thoh sha Supreme Court ruh ngam tieng”

Nongpoh, 28 Rymphang:
Ki Nongshong shnong jong ka shnong Umran-Dairy, Ri-Bhoi District, kynthup ia ki Rangbah, ki Longkmie, ki Samla kumjuh ruh ki khynnah rit, ha ryngkat ka Seng PPM jong ka North Khasi Hill District bad RBPM Central Body, myn ha ka sngi-saitjain, ki la iaid paidbah na pdeng shnong sha ka jaka shna thymmai Petrol/Diesel Pump kaba thmu ban shna hajan wah Umran.
Halor kane ka jingshna Petrol/Diesel Pump thymmai, ki kynhun jong ki Longkmie kynthup ki nongsaitjain nong ha wah Umran, ki la leit ban ia kren ia u trai kane ka Petrol/Diesel Pump, ha kaba iadei bad ka jaboh jabain ka ban mih na kane ka Petrol/Diesel Pump thymmai; hynrei kane ka jingiakren ka la pulom noh, namar ba wan mih bad kam trai pynban da u bah AL Hek, MLA ka Pynthorumkhrah.
Ha ka jingiakren jong u, u la kam ba un leh da kata ka stad saian thymmai, ka ban set ia ka jaboh shirta, hynrei haba ki longkmie ki kylli bniah bha ia u, “Balei ba kata ka stad saian, ym pyrshang shwa ha Wah Umkhrah?”, u kren dom pynban u ong, “Lada lap ia ka jaboh na kane ka Petrol/Diesel Pump sa phah jingthoh sha NGT ne wat sha Supreme Court ruh, ngam tieng”
Ka kynhun jong ki Rangbah, ki Longkmie, ki samla bad ki khynnah rit, kiba la mih paidbah myn ha ka sngi-saitjain bad rah la ki pla card, ban pyrshah ia kane ka jingshna Petrol/Diesel Pump thymmai harud wah Umran, ki la ia soi paidbah ia ka shithi pyrshah ban ai ha u Rangbah Shnong Umran-Dairy, ha kaba ki la ujor ba katei ka Petrol/Diesel Pump thymmai ka ba mut shna hajan wah Umran, kan nang pynjur shuh shuh ia ka jingjaboh jong ka Wah Umran, nalor ki ar tylli ki Petrol/Diesel Pump kiba la don lypa, namar ka jingbym lah ban teh lakam ia ka jaboh kaba mih na ki.
La kylli shuh shuh ba kumno katei ka Petrol/Diesel Pump ka ioh jingmynjur, khlem ka jingtip ki nongshong shnong jong ka shnong Umran-Dairy.?
Ka kyrwoh, ba la soi da ka Kong I Mawnai, ka ong shuh “Ka jingkren baheh u trai katei ka Petrol/Diesel Pump, U bah AL Hek, (MLA Pynthorumkhrah) ka la pynbitar ia shibun ki Longkmie bad halor kane ngi dawa ba u dei ban sangeh shisyndon ia katei ka jingshna ia katei Petrol/Diesel Pump ka jong u”.