Shillong:U President ka Bharatiya Janata Party (BJP) ha ka jylla, u bah Earnest Mawrie, u la iathuh ba na ka liang ka party Bharatiya Janata party (BJP) ka long kaba kloi ban pdiang sngewbha iano iano ruh ki ba kwah ban pyniasoh ia lade bad ka party, kynthup ia u nongialam ka liang pyrshah u Dr Mukul Sangma.
U President ka BJP u bah Earnest Mawrie ha ka sngi saitjain ha ba ia kren bad ki lad pathai khubor u la ong “Ngi long ki ba kloi ban pdiang burom iano iano ruh kiba kwah ban pyniasoh ia lade bad ka party BJP”.
U bah Earnest Mawrie u la kam ruh ba ha shuwa u snem 2023 kin don na ka liang ki MLA ka Congress party ki ban sa wan ban pyniasoh ia lade bad ka party BJP, hynrei u la kyntait ban pynpaw kyrteng mynta.
“Ngam kwah ban pynpaw kyrteng mynt,a hynrei lada ki kwah ban wan pyniasoh ki lah ban wan ia soh bad ngi,ki don na ki MLA ka Congress kiba la dep ban ia kynduh bad ki nongialam ka Central hynrei mynta ngan ym lah ban ai kyrteng namar ba ka don ka 10 schedule ha kaba ka dang long kaba kloi eh ban pynpaw ia ka ta”u la ong.
Haba kylli u la bynrap ruh ba na ka liang ki MLA ka Congress party ki don haduh saw ne san ngut kiba la leit ban ia kynduh ia ki nongialm na ka central ki ba la pynpaw ruh ba ki kwah ban pyniasoh bad ka party BJP.
Halor ka jingshah rem jong ka party BJP, ha kane ka election shiteng samoi u bah Mawrie, u la ong ba ka jingshah rem jong u kyrtong ka BJP na Rajabala Constituency ha kane ka election shiteng samoi ka long namar ba ka party kam pat lah ban suh thied bha ha kane ka Constituency.
“Ka jingshah rem jong u kyrtong ka paty BJP ha Rajabala Constituency ha kane ka election shiteng samoi, ka long namar ba ka Mondal ha Rajabala ka dei kaba dang shu thaw tang shuwa ka election ha kaba ngim pat ioh ban khring ia ki nongthep vote kane ka dei ka jingeh ka ba ngi la map ia ka jingrem”la ong u President ka party BJP u bah Mawrie ia ki lad pathai khubor.
Halor ka jingbymtreh jong ka party BJP ban buh ia ki kyrtong ban ia khun ia ka election shiteng samoi ha Mawrynkneng bad Mawphalang Shiteng samoi na ka liang u bah Mawrie u la pynshai “Ha Mawrynkneng Constituency ka mondal kam pat ioh ia ki dkhot kiba pyniasoh bad ka party ha ka ba kat kum ka kyndon jong ka party ka long ba ngi dei ban ioh 1500 tam ki nongkyrshan na kane ka daw ba ngi la rai ban ym buh kyrtong ha Mawryngkneng n mar haduh mynta hi ki nongkyrshan ne ki dkhot ha ka party ki long tang 700 ngut”
U la bynrap ruh “Kumjuh ha Mawphlang ruh ngi don tang 300ngut ki nongkyrshan kiba la wan ban pyniasoh bad ka party kum ta ngi la rai ban iaid shakhmat ban kham pynkhlain shuwa ia ka party khnang ba kan long kum shibynta ban pynkhreh ia na ka bynta ban ia khun ia ka election ha u snem 2023”.
Na ka liang ka party kan pynlong ia ka jingpynrung ia ki dkhot ha ka party, khnang ba ngin lah ban thaw ia ka mandal na ka bynta ban aireng na ka bynta ka election 2023 la ong u bah Earnest Mawrie, ha k ba u la bynrap ba ha ka election 2023 na ka liang ka party BJP kan ym don kano kano ka jingiasynrop lang bad kiwei ki party bad kan iakhun ia kane ka election marwei, namar ba ka dei ka party national.
Ha ba kylli na ka liang u President u la ong ba dang mynta ka dang long kaba kloi eh ban rai katno tylli ki seat ka BJP kan pyniakhun ia ki kyrtong na baroh ki Constituency ha kaba kan dang donkam ban leit bad ban bishar bha ia ka wei pa ka wei ka constituency hynrei kane kan long ruh kat kum ka rai jong ki nongialam na ka Central, ki state Commitee bad ka Election Commission.
Phi don ban ong eiei?