Lada kwah lynti rel, pynioh shwa ia ka ILP kaba la dawa naduh u 1980, ka kyrwoh ka KSU sha ka sorkar jylla

Nongpoh: Ha ka sngi ba u samla Lambokstarwell Marngar, President ba rangbah ka KSU, u la wan ban pynthymmai ia ki nongkitkam jong 8 tylli ki shnat treikam ka KSU kiba hap ha Nongpoh Circle, u la ban jur halor ka jingthmu ka sorkar ban sdang biang ia ka jingpyntrei ia ka lynti rel sha ka jylla bad uba la pynpaw shai da kaba ong ba ka KSU kan nym ailad ia ka lynti bad lada ka sorkar ka kwah eh ia kata ka lynti rel, ka la dei ban pynkloi shwa ia ka ILP.

Utei u nongialam ba hakhlieh ka KSU, u la ong ba ka KSU ka pyrshah ia ka lynti rel naduh ki snem 1980 bad haduh mynta mynne ruh ka dang don ha ka nongrim ban pyrshah beit bad da lei lei kam lah ban pdiang ia ki jingpynbiej ka sorkar.

“Lada ka sorkar ka kwah palat ia kata ka lynti rel, ka la dep ban pynkloi ha ka ban pynlong ain shwa ia ka ILP hapoh ka jylla, kaba dei ka mat jingdawa ka seng naduh ki snem 1980 bad haduh mynta kam pat urlong satia, khamtam ha u snem 2019 ba baroh ki nongmihkhmat ki lah pdiang ia ka ILP lyngba ka resolution ha ing Dorbar Thawain” ong u Lambokstarwell Marngar.

U la ong ruh ba kat haduh mynta ka seng kam kwah ban iakren halor ka mat lynti rel, namar ka seng kam lah ban ia pein ia ka Jaitbynriew na ka bynta ka jingmyntoi shimet jong no re da kaba pyndonkam ha kyrteng jong ka roi ka par.

Lada ki leh jubor ngin ruh ngin pyni da ka bor bad ka ban sa long biang kumba la jia ha u snem 2017 bad kaba la pynlong ia ka North East Frontier Railway ban sangeh shisyndon halor ka jingpyntrei ka Steshon Rel ha Ronghona, Byrnihat. Ha kaba watla ki la don shibun ki dkhot ka seng kiba la shah kem halor katei ka jingjia, hynrei kat haduh mynta kim pat kynran dien bad kiba la long kloi ban len ialade, na ka bynta ban pyrshah ia ka lynti rel hapoh Ri Khasi, u la bynrap.

Ia katei ka jingpynthymmai ia kitei ki 8 tylli ki shnat treikam la pynlong ha Dorbar Hall Sajer, Nongpoh, kitei ki shnat treikam ka KSU kiba hap hapoh ka Nongpoh Circle, ki kynthup ia ka Mawroh Unit, Umjari Unit, Mawdiangum Unit, Saiden Unit, Mawphrew Unit, Nartap Unit, Langpohdon Unit bad ka Umsaw Nongkharai Unit.

Nalor u samla Lambokstarwell Marngar, kiba la donlang ha katei ka sngi, ki kynthup ia u samla Eric Nongkynrih Asst. General Secretary KSU CEC, u samla Ferdynald K. Kharkamni President KSU NKHD, u samla Lambok Joseph Rymbai Vice-president KSU NKHD, samla Lester Nongbet Organising Secretary KSU NKHD, samla John Lyngdoh President KSU Nongpoh Circle lem bad kiwei.