Lada kren hindi U Lat, yn nym shong dorbar, byrthen ka VPP

Shillong:Ka seng ba don ha ka liang pyrshah ka Voice of the People Party, ha ka sngi thohdieng ka la byrthen ba kan ym leit shimbynta ha ka jingkren maitphang jong U Lat ka jylla ha ka dorbar mang tyngka ban wan, lada u kren da ka hindi khlem don u nong pynkylla sha ka phareng.

Kane ka rai la shim da ka Parliamentary Party, ha ka jingialang ha ka 30tarik, u bnai Kyllalyng kot, ha kaba la dep ban phah ia ka jingthoh sha u Lamphang jong ka Ïing ha ka sngi thohdieng.
Ha ka shithi sha u Sangma, u Secretary jong ka VPP Parliamentary party u bah Heavingstone Kharpran u la ong ba ka dorbar mang Tyngka na bynta ki paidbah jong ka jylla Meghalaya ki dei ban bud ryntih ia ka jingpyniaid dorbar, hynrei kumba la iohi ha ka dorbar ba nyngkong u lat u la kren hapoh ïingdorbar da ka hindi, kaba la pynkulmar ia ki dkhot ki bym sngewtynnad ia ka hindi ha kaba ki la buh jingmut ruh ba ka Hindi kam dei satia ka official language jong ka jylla Meghalaya.

Haba iadei bad kane ka parliamentary party jong ka parti Voice of the People Party kaba la pynlong ha ka 30 tarik Kyllalyngkot 2023, ka kyrpad ba ka jingkren jong u lat kan dei da ka ktien English bad lada u lat ba donburom um lah ban kren da ka ktien phareng ka ophis treikam jong u Lamphang ka dei ban buh da u Translator ha baroh ki jingkren ki jong u lat.