Lada ki samla kim pass UPSC, ka lawei kaba kah dum, ong u myntri

Shillong:U myntri ka tnad pule puthi ka jylla u Rakkam A Sangma u la pynpaw ia ka jingsngewsih ba ki samla Meghalaya kim shym la don iwei ruh ban pass ha ka eksamin Union Public Service Commission (UPSC), kaba la pynbna dang shen.

Haba kren mynta ka sngi, u Rakkam u la ong ba kane ka jingjah kyrteng ka jylla, kan long ka jingkyrsiew thiah ia ka sorkar, ia ki jaka pule bad ia ka jylla namar ba ki samla ka jylla kim dei kiba biej.
U Rakkam u la ong ba lada dang bteng kane ka jingbym don ki samla kiba pass ha ka UPSC, ka lawei kan long kaba dum. “Ka jingjah kyrteng ka Meghalaya ha ka eksamin UPSC ka long kaba sngew khia jur. Ki samla ka jylla kim dei kiba biej, hynrei lada kane ka jingbym don kiba pass ha ka eksamin UPSC kan bteng, kan long ka lawei kaba dum”, la ong u Rakkam.

Ha kajuh ka por, u la ong ba kane ka lah ban dei na ka daw ki rukom pule, ki jaka pule, ki syllabus bad ki samla kim ioh ban pyniadei bad ka kyrdan ha ka ri.
Ha ka jingshisha, ka sorkar ka la pyrshang da kaba wanrah ia ki prokram bapher bapher ban plie lad ia ki samla kiba kwah ban iakhun ia ka UPSC eksamin, hynrei kaba kongsan ka long ban pynbha ia ka rukom pule puthi naduh ki skul, ki kolej ha ka jylla.

“Ka daw ka lah ban dei namar ba ka rukom pule, ki jaka pule, bad ki syllabus, bad ka jingbym ioh lad ki samla ban pyniadei bad kiwei ki bynta ha ka ri”, la ong u Rakkam.