Shillong: Ha ka jingialang pynrem kaba la long ha ka sngi saitjaiñ jong ka taiew ha Parking Lot ka Addl. Secretariat, u Emiki Kurbah uba ñiah ia ka kali ba shong ka kong Agnes Khjarshiïng bad ka Anita Sangma u la iathuh ba katba ki dang hiar na Shillong ban leit sha Lad Rymbai ha ka por 9:30 baje eiei mynstep, ka kong Agnes ka la iathuh khana ha u, ba ki la don ki briew kiba wan tyrwa pisa ia ka, hynrei kam treh bad ka la iathuh ruh ba ki la don kiwei kiwei ki sengbhalang kiba la shim pisa na ki malik dewiong. Ha katei ka jingjia shah shoh, u la ong ba haba peit na ki riam ki beit jong ki briew kiba shoh ia ka kong Agnes lah ban ithuh ba dei ki malik dewiong bad kitei ki dei kiba dang kham samla karta.
U nongñiah kali ba shong ka kong Agnes uba dang kren ha ka jingialang pynrem kaba la long ha ka sngi saitjaiñ: Rupang.
Utei u nongñiah kali uba dei ruh u Para Legal Volunteer ka Meghalaya State Legal Authority u la ong ba lada ki pulit ki mon ban kem ia ki briew kiba donkti da kaba suk ki lah ban ioh. “Lada ki pulit hi ki mon ban kem da kaba suk kin ioh bad tang hapoh shi taiew lah ioh kem lut” u la ong. U la iathuh ba ha ka jaka ba shah thombor ka kong Agnes kham hakhmat khyndiat ki don ki dukan, ki don ki kali kiba ieng bad lada tohkit na ki lah ban lap da kaba suk, nangta u la ong ba katba dang hiar sha Lad Rymbai ka kong Agnes ka la shondur bad katba nangdep shondur ka la phah message sha ki paralok jong ka bad tang na kitei ki trok kiba la shah shondur ruh u la ong ba lah ban lap ia kiba donkti. Utei u nongñiah kali u la ong ba ki pulit, ki dei ban kem ia kiba donkti bad ki dei ban tih tyllong ruh ban tip mano ba phah ia ki ban leh ia katei ka kam.