Lada ki nongshong shnong, ki ai rong la ki iing, ka Shillong kan thaba khriak:Conrad

Shillong: “Ki don bun bah ki iing ha Shillong, ki bym ju ai rong satia ia la ki iing” ong U Conrad Sangma, myntri rangbah ka Jylla bad kumta u pynpaw ia ka jingsngew donkam, ha kaba u buh da ka kyntien “Nga, manga bad ka iing jongnga” bad ula ong shuh “Lada ki nongshong shnong jong ka Shillong, Jowai, Nongstoin, ki ai rong ia la ki iing, ai rong ia la ki kynroh iing, ka Sor Shillong kan thaba hi khriak” bad kumta U Conrad, u pynsngew ia ka jingdonkam jong ka kyntien “ma nga” ba ngin leh ia la ka jong ka bynta.

La ong biang U Conrad “Lada kawei ka longing ka kynshew na ka bynta ka kam kaba rit ban shna dabor um ha tnum iing, kata ka sdang ba ka jingpynkhuid ia ka sawdong sawkun kan dei na la rympei iing. To ngin shim kabu da kaba ong Ma Nga, Da Ma NGa bad ban iathuh lem sha kiwei ban bud nuksa ban sumar ia ki sawdong ban kiar na kaba leh jaboh”, la ong u Myntri Rangbah.
Ha ka jingkren jongu, u Myntri Rangbah u la phah khubor kitbok sha ka bor pyniaid ka Shillong Times halor ka jingjop jongki, ban iaid lynti ha kine ki 75 snem ba la leit. U la ong ba u Shillong Times u la don ha kane ka thain ban shakri ia ki paidbah ka jylla.
“Nga la ioh mynsiem na ki samla kiba kren da ka jingshit rhem bad nga iathuh ia ki ban mad ia ka ding bad ka jingshit rhem hapoh jongki, nga ioh mynsiem haba ioh sngap na ki nongkren kiba shit rhem”, u la ong.
U la ong ba ha ka por ba pynleit jingmut ialade, ka donkam ruh ban pyrkhat ia ka jingiashong iasahlang da ka jingkitkhlieh.
Ha kane ka sngi, la ioh ruh ia ka jingkren na u Dr Jitendra Singh, uba peit ia ka Development of North Eastern Region (DoNER), Prime Minister’s Office; Personnel, Public Grievances and Pensions; Department of Atomic Energy and Department of Space, nalor ka Editor ka kong patricia Mukhim, u Managing Director u Manas Chadhuary nalor kiwei.
Ha kane ka sngi, la pynshongshit ia ka jingialang da ka jingrwai bad ka jingshad bad ka jingsam khusnam sha ki katto katne ngut. La ioh ruh ia ka jingkren na u Afroz Shah uba la ioh khusnam na ka UN halor ka jingmaitphang jongu ban pynkhuid ia ki wah bad ban iada ia ka mariang.