Lada ki dorbar shnong ki pyrkhing, ka  sorkar kan kyrshan:Prestone

Shillong: U symbud Myntri rangbah ka jylla u bah Prestone Tynsong, u iathuh ba lada ki dorbar shnong ki pyrkhing ia ki kyndon ban bud ia ka jingbthah jong ka tnad ka koit ka khiah, kum shi bynta ban ialeh pyrshah ia ka khlam Covid-19; na ka liang ka sorkar jylla kan kyrshan ia kata ka rai jong ki dorbar shnong.

U bah Prestone, u la iathuh ba wat la na ka liang ka sorkar kam shem la pynmih ia kano kano ka jingbthah ha kaba iadei bad ka jing pyrkhing ban bud ia ki kyndon, hynrei lada ki dorbar shnong ki leh ia kata, ka sorkar ka kyrshan ia kata ka rai jong ki.

U la ong ruh ba ka jingpynpyrkhing jong ki dorbar shnong, ia kine ki kyndon ka pynpaw ba ki dorbar shnong baroh ki shim khia, ha ka ban ia leh pyrshah ia ka khlam covid-19 ha kane ka jylla.