Lada ki Bank ki leh bym suidniew ia ki jingujor, pyntip sha ka RBI

Nongpoh: Myn hynnin ka sngi Balang, ki heh ka Reserve Bank of India ha ryngkat bad ki nongtrei ka Punjab National Bank, ki la pynlong ia kawei ka prokram ban ai jinghikai ia ki paidbah halor ka Banking Umbudsman sheme 2006, kaba dei kawei na ki shnong Maikhuli Ri Bhoi District, ka shnong khappud hapdeng ka Meghalaya bad Assam.

Ha katei ka prokram, la wan ban pynshai da ki heh ophisar ka RBI bad PNB, ha kaba ki la ioh ban pynshai sha ki paidbah halor ka Banking Ombudsman Scheme, ki heh na ka RBI bad PNB kiba la don ha katei ka sngi, ki kynthup ia u Sh Thotngam Jamang, Banking Ombudsman ka RBI, Guwahati, u Sh. Sanjeev Singha, Regional Director ka RBI, Guwhati, u Shio Sankar Siingh, Zonal Manager, ka PNB, Guwahati lem bad kiwei pat. Nalorkata ha katei ka sngi la wan iashimbynta da shibun ngut da ki rangbah shnong lem bad ki paidbah na ka shnong Maikhuli.

Lyngba katei ka sngi, ki heh ka RBI kiba dei ruh kiba peit ia ki jylla ka thain Shatei Lam Mihngi, ki la pynshai sha ki paidbah, da kaba iathuh da kaba pyntip ba ha u snem 2019, ki la don haduh 3.24 lak ki jingujor na ki paidbah ia ki bank bapher bapher, kiba la ujor sha ka Reserve Bank of India bad haba iadei bad kitei ki jingujor, u la ong ba jan baroh na kitei ki jingujor la dep ban pynkhuid bad ka la long ka jingmyntoi na bynta kito ki paidbah, kiba la shah lehbein ha ki bank bapher bapher.

Uwei na ki heh ka RBI, u la pynshai sha ki paidbah da kaba ong lada phi don kino kino ki jingujor pyrshah ia kano kano ka Commercial Bank bad haba kiba kum kitei bank kim pynkhuid ia ka jingujor jongphi hapoh shibnai, phi lah ban leit ujor syndon sha ka RBI, la ka long lyngba ki shithi jingujor ne ki lah ruh ban phah ia ki jingujor sha ka e-mail jong da ka RBI, kata lyngba ka website jong ka RBI, khnang ba ka RBI kan ioh ban leh ia kaba donkam baroh.

Nalorkata, ha katei ka sngi, ki la pynshai halor ki bynta ba kum ki nonglum ne nongkynshew pisa jong ki bank bapher bapher kim dei ban shaniah ha kino ki message ne ki call kiba phone ia ki ban pan kum ki OTP, ki pin atm bad kiwei kiwei ki jingtip kiba dei ba ki account jongki, namar kine ki dei kiba shu leh thok tang ban ioh sei pisa na ki account jongki.