Lada khlem ka akor bad ka burom ka kyrdan ka long lehnoh ei: AL Hek

Shillong 15 Risaw: Ka skulbah North-Eastern Hill University mynta ka sngi ka 15 tarik Risaw 2024 ka la plie paidbah ïa ka Integrated Teacher Education Programme (ITEP) na ka bynta ban pynkiew shaphrang ïa ki nonghikai kiba donsap bad shemphang na ka  bynta ban pynïar ïa ka pule puthi ha ki kyrdan bapher bapher.

Ha kane ka sngi la wan ban ïadonlang da u Myntri ka tnad Ri jingri ka sorkar jylla u Bah Alexander Laloo Hek uba la long kum u kongsan ha ka sngi plie ïa ka prokram jong ki jait jingpule kiba kynthup naduh ka B.A. B.Ed and B.Sc. B.Ed na ka bynta ka samoi pule jong u snem 2024-25.

“Na ka liang u kongsan Bah AL Hek ula iaroh ïa kane ka jingsdang ka ba ïarap kyrshan da ka Ministry of Education. U Bah Hek ula batai pynshai ruh halor ka jingthmu jong kane ka prokram ka long ym tang ban pynmih ïa ki nonghikai kiba biang bad shemphang hynrei ban long ruh kum ki nongshong shnong kiba don ka jingkitkhlieh.

U la ong ruh, ba ka jinghikai lada khlem ka akor ka burom ka kyrdan ka shu long lehnoh eiei.

Ïa kane ka prokram kaba haduh 4 snem ka ai ka jingtyrwa na ka bynta ki ar tylli ki kyrdan pule ne ka dual-major bachelor’s degree, da kaba pyniasohlang bad ka sobjek Education ha ryngkat bad ka jinglong ba kyrpang kiwei pat kum ka ktien, ka saian, bad ka jingkhein. Kane ka prokram ka bud thik katkum ki kyndon jong ka National Education Policy 2020, da kaba pynleit jingmut ha kaba iadei bad ka rukom ban pynsuk, ka jinglah ban thoh bad pule bun tylli ki jait ktien bad ka jingpyndonkam ïa ka ktien shnong, la bynrap u bah Al Hek

Shuh shuh ula ong ruh, ba ha kane ka prokram ki khynnah ki ïoh ïa ka lad ban jied ïa ki sobjek katkum ka jingsngewtynnad jong ki bad ka thong jong kane ka prokram pule ruh ka long ban pynmih ruh ïa ki nonghikai kiba don ka mynsiem ban hikai kiba tbit bad ban nang kumno ban hikai.

Na ka liang u Vice Chancellor jong ka skulbah NEHU pat u Prof. Prabha Shankar Shukla, ula batai halor ka jingthmu ba kongsan jong kane ka prokram bad ruh kaban long ka dak ban pynsahnam na ka bynta ki nonghikai hapoh ka thaiñ.
Kumban shu pynkynmaw ba ia ka  ITEP la pynwandur na ka bynta ki khynnah pule ha ki kyrdan Secondary kiba naduh klas 9 haduh klas 12 ha ryngkat ka jingthmu bad ka jingpynleit jingmut ban kynthup lang ia kiwei pat ki jait jinghikai ban seng kam bad ruh ki kam kiba hap ban pyndonkam da ka kor kompiwtor.