Lada khang ban tih dewiong, balei bym khang ban tih mawshun: Bindo

Shillong, 16 Jymmang:
U bah Bindo M La nong, nongialam jong ka seng UDP, haba iakren bad U Rupang, hynnin ka sngi, ula ong

“Lada khang ban tih dewiong, balei, bym khang ban tih mawshun”.
U bah Bindo, u ong ba haba tih mawshun, ki briew, ki tih, da ki krem khnai, ha kaba ki tih da ki thliew, sha ki jaka, ba don dewiong, katba haba tih mawshun, tih mawthup ban shna iing, ki pyn khyllem lut ia ki lum ki wah, haduh ba kin madan lut bad ula pyni nuksa, kumno bas ha Khanapara ha kine ki sngi, ba la twa lut ki lum ki wah, namar ba la pynhap da ki mashin,kiba khlain bor. “Lada leh kumta, ki jaka jongngi, kin kylla madan lut bad ka jingjulor jong ka mariang, kan long kaba shyrkhei”.
La kdew utei u rangbah, ia ka jingtih mawshun ruh sha Nongtalang, ha kaba u ong ba mynta ki lum ki la twa lut, namar ka jingtih naphang ia u mawshun bad sa ka jingktah ia ka um ka wah, kaba la jubor haduh katta katta.
La kynthoh ruh U bah Bindo, halor ka jingtih mawshun jong ka Lafarge sha Shella, Nongtrai, ha kaba ka la pynmadan lut ia ki lum ki wah bad kaba kham ima, ka long ba mynta lei ki la ngam shapoh ramew ruh, na ka bynta ban khlong ia ki hajar ton ki mawshun, ban kit sha Bangladesh.
Haba phai pat sha ka krem khnai, ha kaba tih dewiong, U bah Lanong, u ong ba katei kam pynjot satia ia ka mariang, namar ba ki dieng ki siej, ki neh beit shalor jong ka mei ramew, katba ka jingtih ka long tang sha ki krem, kiba don shathie shapoh krem, shaba don dewiong bad kaba la tih suki suki, lyngba ki thliew kiba rit. U bah Bindo, u pynkynmaw ruh ia ka polisi tih dewiong, kaba ka sorkar Jylla, ka la dep mynjur, ha u snem 2012 bad ha katei ka polisi, ula kren shai,da kaba ong “khlem iakren ban pynduh krem khnai” bad ka daw, kaba la ai da U bah Bindo, ka long namar ki par dewiong, ha ka Jylla jongngi, ki long kiba rit bar it bad kam dei satia, kum sha ri dkhar, ba ki dei kiba heh bad kiba lah ban tih da ki tiar mashin kiba heh bah eh. La ong U Bah Bindo “Arsnem, ngi la pynkhreh ia katei ka ain” bad ula ong shuh shuh, ba katei ka ain mar poh khyndew, ka kren shai ruh, ba dei ban iada ia ka mariang, dei ban iada ia ki tyllong um, dei ban iada ia ki paidbah, na ka jingbeh ka lyer bih, ban nym pyntuid jabo kulmar bad u iathuh ruh, ba wat ynda, haba la pynkut ia katei ka jingtih par, ba dei ban da tap bha, ia ki thliew ki syar, ki krem ki kroh, ban thung dieng thung siej, ban shna ia ki madan ialehkai bad kiwei ki jingdonkam jong ka jaka.