Lada kane ka jingiakren kam biang, ka HNLC, kan dang iai bteng, wat sa 35 snem ruh, ong ka kyrwoh

Shillong: Ka HNLC ka pynpaw ia ka jingbitar halor ka jingleh mradkhlaw ki pulit Assam bad ka pynremjur ia ki Pulit Assam kiba la siat pathar khlem jing isynei(cold-blooded massacre) ia ki paradoh parasnam ha Block 1. “

Kane kam dei ka sien ba nyngkong ba ka Sorkar Assam kan thombor bad siat pyniap ia ki briew jongngi ha khappud. Ka daw tynrai baroh ka dei namar ba ka Sorkar Meghalaya ka long kaba tlot. Ha ka jaka kaba ka Sorkar India kam don mon ne kam lah ban weng ia ki jingeh ka jylla Meghalaya halor u pud u sam, ka sorkar Meghalaya ka dei ban sngewthuh ban leh la ka jong ka kamram, da kaba sngewthuh ba duna ha ki bor pulit,ka lah dei ban pynrung kam pulit ia ki riewpaidbah ka ban long ha ka dur ka ‘conscription’ kumba pynrung kam shipai ha kiwei ki ri khnang ban wanrah iaka jingshongsuk shongshngain khamtam ha khappud; lym kumta ngin sa long kum ki nong palestine ban shu kylla phetwir kha ma kha hala ka jong ka ri” ong ka kyrwoh.

Ka kyrwoh, ka ong shuh shuh, ba ka jingkam na ka liang ka Sorkar Assam ba ka Mukroh ka hap hapoh ka west Karbi Anglong ka pyni shaikdar ba kane ka jingjia ka dei ka kam kaba ki lah pynkhreh bha khnang ba ki paidbah kito ki thain kin sheptieng bad rung noh sha Assam, ha ka kylla kaba ar ha ka jingpynbeit pud ki 2tylli ki Jylla.

Ka Jylla Meghalaya ka lah ioh ia ka iing kaba khlem u pud u sam bad ka jingmynthi ka Sorkar kmie ban pynbeit ia u pud u sam ka lah wanrah pynban ia ka jing iaumsnam ym tang ha Meghalaya, hynrei ha kylleng ka thaiń shatei lam mihngi. Kane imat ka lah dei lypa ka kam ialehkai haka sain hima(political game) ka sorkar kmie khnang ban pyntlot bad ban khanglad ia ka jingiatylli ha kine ki Jylla ha Northeast, ong ka kyrwoh.
“Ka mat ban ioh ia ka jing ithuh na bynta ka iing lajong bad u pud u sam ba tikna ka bri u Hynńiewtrep ka dei ka jingdawa kaba hakhmat eh jong ka HNLC. Ngi kyrmen ba kane ka jingiakren iasuk bad ka Sorkar kan long kaba seisoh khnang ba ngin lah noh ban weng ia ka jingeh ka Jaidbynriew” ong shuh ka kyrwoh na ka seng.

“Lada jia ba kane ka jingiakren kam biang,ka jingialeh jong ka HNLC kan dangiai bteng wat lada kan shimpor sa 35 tylli ki snem. Lada ka jingsuk ka mut ba ngi hap ban kbum ia la ka shyntur ha ka saw ka sian, ngim kwah ia kata. Lada ka jingsuk ka mut ba ngi hap ban shu ieng pdeng halor ka jingleh bymhok(injustice)ia kata ruh ngim kwah namar ka jingsuk kiba dangim ka pher na ka jingsuk kiba lah iap” pynkut ka khubor, na U bah Saińkupar Nongtraw, General secretary cum Publicity secretary,HNLC.