Lada ka UDP ka mon shisha, ka lah ban pyn urlong, ong ka KHNAM, ban kynriah ia ki kharmetor na Iew Mawlong

Shillong: Na ka liang jong ka KHNAM, ka pynpaw ia ka jingsngewkhia jongka, halor ka jingtuklar khlem nongrim bad khlem da tip bniah ia ka sdang ka kut, da ki bor ba na bar halor ka ishu them iewmawlong. Katei ka seng, ka pynpaw ba kam lah ban pdiang bad la ong ba kane ka lah ban pynbitar bad ialam bakla ia ki ba bun balang bad ka lah ban pynsngewthuh bakla ia ka sorkar pdeng bad ka minority Commission. “Ngi long ka jaitbynriew kaba don ka jingngeit ha ka jingiaburom iwei ia iwei bad ha ka jingiaishah. Ka jaka them iewmawlong ka la long ka jaka kaba jaboh bha (Slum) kaba la long ka jingma ym tang ia ki nongiaid nongwan, hynrei wat ia ki Harijan ki ba sah ha kito ki jaka” ong ka kyrwoh. Ka KHNAM, ka ong shuh shuh ba ka jingthmu kam dei ban beh ia kine ki Harijan na kane ka jaka, hynrei ban pynkynriah ia ki sha kawei pat ka jaka kaba kham khuid kaba biang ka um bam um dih bad kiwei kiwei, hynrei ka jingpyneh jong ki ban leit sha kawei pat ka jaka ka pynpaw ba ka don eiei sha lyndet bad lehse kine ki la kwah ban kam trai junom syndon ia ka khyndew kaba long pyrshah ia ka jingthmu jong ka 6th scheduled ka Ri India bad ka land transfer act jong ka jylla.
“Ka seng UDP kumba ngi la iohi lyngba ki lad pathai khubor ka la pynskhem ba dei ban pynkynriah beit ia ki na katei ka jaka bad kane ka long ka jingai mynsiem namar ngi tip ba ka UDP ka dei ka seng kaba iadon bad ka ba kyrshan bha ia kane ka sorkar kaba mynta, bad ngi tip ba lada ka UDP ka mon shisha ka lah ban lah ban pynurlong ia kane ka jingthmu” ong shuh ka kyrwoh jong ka KHNAM. Ka Sorkar Punjab, ka NHRC, ka Minority Commission bad ka sorkar pdeng baroh ki dei ban iohi ba katei ka jaka kam iahap shuh ha ka kyrdan kaba biang na ka bynta ban sah ki briew bad ka jingpynkynriah ia ki kan wahrah ka jingkoit jingkhiah ia ki bad ka jingkylluid ia baroh. Ka Hima ka Council bad ka Municipal ki la bakla naduh mynshwa haduh ba poi u pud mynta ba kine ki jaitbynriew ki la sngew khun khatduh ia lade haduh ba ki nud ban dawa da ka pata kaba pura na ka sorkar jylla, pynkut ka kyrwoh na U bah Pyndapborthiaw Saibon, President KHNAM.