Shillong: Da ki spah ngut ki dkhot ka KSU ryngkat ki nongshong shnong na ki thaiñ khappud ka Meghalaya bad Assam ki la shong kyraiñ mynta ka sngi ha Parking Lot ka Addl. Secretariat ban pynpaw ka jingpyrshah ia ka sorkar halor ka jingshah ban beiñ jong ki Khasi kiba shong basah ha khappud bad ka Assam.
U President ka KSU u la ong ba lada ka sorkar kam lah ban ai jingiada ka dei ban ai da ki tiar ialeh ia kito ki briew kiba sah ha khappud ba kin iada ialade. U la ong ba na ka por sha ka por k briew kiba pynmhi jingkulmar ha khappud dei ki Nepali, “Ki dei kiei kine ki briew, mano ba ai bor ia ki, kim dei tang ki nong India ruh, ka sorkar ka dei ban pyni da ka kam ym da ka ktien bad lada kam leh eiei ha kine ki khyndiat sngi ka KSU kan hap ban pyrkhat da kumwei pat” ong u samla Lambok Marngar President KSU.
U samla Lambok u la pynkynmaw ba ha u 2010 ki la don 4 ngut ki Khasi kiba la kyllon iap ha Langpih hynrei ka sorkar ka shu leh mynleh sngewkhia tang ha ito I khyllipmat hynrei ka khlem shimkhia pat ia katei ka bynta. U la ong ba lada kane kan aiai jia ym lah ban tip ioh ka poi ka por ban mih ka jingiaumsnam kumba la jia ha ki snem kiba mynshuwa. U la iathuh ba la tynruh sha ka NESO ba kan dawa ba ka sorkar India ka dei ban pyndkut noh ia ka Indo-Nepal Treaty ha Meghalaya naba ki Nepali nalor ba ki ioh ban rung laitlan ki thaw sa ki jingkulmar pat na ka por sha ka por.