Lada ka jylla kam ioh ia ka ILP, wat ka sixth Schedule ruh kan sa jah noh, ong ka CoMSO

Shillong: U Nongialam jong ka Confederation of Meghalaya Social Organisation (CoMSO) u bah Robertjune Kharjahrin, u la ong ba lada ka jylla Meghalaya kam ioh ia ka Inner line Permit, khlem pep ka sixth schedule kaba la don ruh kan sa jah noh na kane ka jylla.

Haba iakren bad ki lad pathai khubor, na ka liang u bah Robertjune, u la ong ba ka sixth Schedule kadei ka ain ban iada ia ki riti dustur, ia da ia ki jaka puta katba ka ILP ka dei ka ba iada ia ka jylla na ka jingrung kyrthep jong ki barjylla. “Lada ka jaitbynriew kam ioh ia ka ILP, wat ka sixth Schedule ruh kan sa jah noh namar ba ka jingjied jong ki MDC ruh ka long kat kum ka Adult Suffrage bad lada la bun da u bar jylla ban ia ki trai muluk, ka jylla jong ngi yn sa synshar da ki barjylla” u la ong.

“Kumba la iohi ba ki 10 tylli ki District Council kim don ia ka bor ban ban iada ia u poiwir kum ha Garo Hills la long MDC da ki barjylla bad khnang ba ka ain ban iada ia ka riti dustur kan skhem ka jaitbynriew ka donkam ia ka ILP “u la bynrap. “Kiwei ki jylla ki ba don ia ka ILP ki don lang ia ka Sixth Schedule lane ka article 371 bad tang ka jylla Meghalaya ka ba don ia ka sixth schedule “u la ong. U la ong ruh ba ka sorkar pdeng ka dei ban burom ia la jylla Meghalaya da kaba kan ai noh ia la jingmynjur ia ka ILP bad ka jaitbynriew kan ym treh ban kylliang ia ka ILP bad ka sixth schedule bad u la ong ruh ba ka dei ka hok jong u Hynniewtrep bad u Garo ban ioh ia ka jingiada ia ka jaitbynriew bad ka dei ban ioh ia ka ILP ba khlain bad ka sixth schedule ba khlain.