“Lada ka HSPDP, kam lah ban bujli nongialam, kan sa khylliap lama”

Nongstoiñ, 8 K’Lyngkot:
“Ka jinglong jingman hapoh ka seng HSPDP hadien ka jingkhlad noh jong u Maieit Hoping Stone Lyngdoh, ka la kylla khongpong, ha kaba iadei bad ki nongrim trei kam hapoh ka jingialam jong u bah Ardent M Basaiawmoit kum u president ba mynta” ong ka kyrwoh lyngba ki katto katne ngut ki volunteer kiba dei ruh kiba la don bynta lang bad u (L) Hopingstone Lyngdoh na ka bynta ban ia khun ban pynioh ia ka Jylla kaba pura bad kiba seng nongrim ia ka party HSPDP naduh u snem 1968.
Katkum ka kyrwoh khubor bala phah da ki katto katne ngut ki Volunteer State Fighter, ki la ong ruh ba lada ka party HSPDP kam lah ban bujli noh mardor ia u nongialam kane ka party khlem pep kan sa khylliap lama, kumta ha shwa ba katei ka party kan shah khylliap lama na ka liang jong kitei ki volunteer kila kyntu jur ba u president ba mynta u dei ban hiar shuki noh mardor bad ai ba ka party kan thung president thymmai khnang ban lah ban pynneh pynsah ia ki nongrim ba skhem jong ka party ha kaba u maieit Hoping ryngkat bad kitei ki volunteer kiba la seng nongrim kan khie rasong biang sa shisien.
U bah D.E.Lynkhoi Secretary Volunteer State fighter , u bah B.Diengdoh Chairman VSF lem bad ki phra ngut ki wei pat kiba dei ki dkhot jong ka VSF ka HSPDP bad kiba la long ki nong shah set patok ha ka por jong ka jingialeh Hills State bad pyrshah ia ka sub state ha kapor jong u Ma Ieit Hoping kila pynpaw ruh ba ki katto katne ki mat ba ka party ha ka jingialam jong u bah Ardent Basaiawmoit ka klet noh ia ka ei kaba u ma ieit Hoping u shait pyrta kiba kynthup ia ka Para 12 A jong ka khyrnit kaba 6, halor ban pyneh pynsah ia ka khyndew ka shyiap ka riti ka dustur, ha kaba iadei bad ka Khasi Jaintia State bad ki wei ki wei.
“Kumba ka long mynta ki nongialam jong ka party HSPDP ki shu lap miet tang ban beh seng ia ki nongialam bad ki dkhot jong ka party, bad ka jingbeh seng haduh 3 ngut ki MDC ka long pyrshah ia kaei kaba u ma ieit u ieng ha ka nongrim” ong kitei ki rangbah da kaba kila bynrap shuh shuh da kaba ong ba sa katno shuh kitei ki nongialam jong ka HSPDP ba mynta kin nang iai beh ym tang ia ki MDC hynrei sa ia ki wei ki wei dkhot jong ka party.
Kitei ki rangbah ki la kynthoh jur ruh ia ka jingleh donbor jong ki nongialam ba mynta, kum ka jingpynduh noh ia ka HSPDP, WKH, ia ka Mairang Area unit ia kaba la thung thymmai pat shwa ka election shiteng samoi sha ka KHADC bad kane kala paw shai lyngba ka jingshah rem kput jong u kyrtong ka party ha ka by election sha ka KHADC u bala Ioh tang 879 vote bad halor kine kiei kiei kiba la jia bad ka jingleh jong u nongialam hato lah mo ban pynurlong ban ialam ia ka sorkar ha u 2018? pynkut ka kyrwoh na ki tei ki volunteer.