Lada ka dohkha, kam lah im khlem um, nga ruh, ngam lah im khlem maphi, ong ka Sonali ia ka Didi

KOLKATA: Hadien ka jingjop don burom jong ka TMC, ha ka elekshon MLA, ba dang shu dep, ki don shibun ki nong ialam barim jong katei ka seng, kiba la leit sha ka seng BJP, kiba kwah ban leit phai biang sha ka seng TMC.

Kawei na kitei, ka dei ka Sarala Murmu, kaba da thrang hir hir, ban leit phai biang sha ka seng synshar, ha West Bengal.

Nangta sa ka Sonali Guha, kaba dei ka MLA barim jong ka TMC, katei ruh ka la pynpaw ia ka jingthrang hir hir ban leit phai biang sha ka TMC.

Ka Sonali, ka la thoh hynnin ka sngi, ia ka shithi sha ka Banerjee bad pan map, halor ka jingmih noh jongka, na katei ka seng TMC.

Katei ka MLA, kaba la jop la saw sien kynthih, na Satgachhia ha South 24 Parganas district, ha ka shithi sha ka Mamata, ka la ong “Kumba ka dohkha, kam lah satia ban im khlem ka um, kumta ma nga ruh, ngan nym lah satia ban im khem maphi Didi”.

“Nga pan map na phi, namarkata, namar lada phim map, ngan nym lah satia ban im. Sngewbha shah, ba ngan wan phai bad ba ngan pynlut ia ka jingim jongnga, ha ki kti jong ka jingieid jongphi”.